WILLEMSTAD. - Minister Suzanne Camelia-Römer a pidi un reunion den Komishon Sentral di parlamento, pa via di e kanal aki yega serka e pueblo di Kòrsou en general pa loke ta trata informashon den e mundu di salubridat, spesífikamente pa e loke ku tur hende ta preokupá pe, e desaroyo mundial pa loke ta trata Coronavirus. Un di e puntonan ku e minister a trese bon kla dilanti ta ku aki tin un bon nivel di salubridat, Kòrsou tin profeshonalnan riba nivel hopi haltu i ku ta keda solisitá pa vários pais den region i asta Ulanda. E minister a bisa tambe ku e no traha a base di pániko i aktua djis pasobra e tin poder. E lo respetá su profeshonalnan su konseho. P’esei no ta pa motibu ku un pais chikí den Karibe a rechasá un krusero, pa motibu ku nan no por a atendé, Kòrsou tambe mester rechas’é.

Durante su disertashon na parlamento, Minister a splika ku riba un base diario e ta den kontakto ku su tim. Komo minister el a skohe e riesgo di tuma medida basá riba e konsehonan di su profeshonalnan.

Pues su persona no ta hanshá ni spanta a base di rumornan. Minister a skohe pa echo i siensia.

Esaki ta nifiká ku Minister ta respetá e profeshonal, den e kaso aki dr. Izzy Gerstenbluth  aki i su tim i el a splika ku e lo sigui nan konseho i si e resultá robes Minister a bisa ku e lo baha i di otro banda si e resultado ta bon, tur hende lo lubidá.

Pero un kos ta sigur, komo minister Camelia-Römer a bisa ku e lo no hasi niun profeshonal chikí dor di hansha i miedu polítiko. E lo respetá nan konseho.

No ta pa motibu un pais chikí den Karibe ku no por a dil ku e riesgo basá riba nan nivel di kuido i nan a tuma nan desishon ku pa nan ta bon, aki na Kòrsou mester aktua den pániko.

Komo mandatario e ta keda informá su mes 24 ora pa dia kontinuamente den e tim i esaki ta un linia ku el a skohe i lo sigui e tim di profeshonalnan pa guia e pais.

Den e mesun rosea e minister a trese dilanti ku e no ta sigui e profeshonal nan ku wowo será, pero e tambe ta sigui e desaroyo mundial i di den Karibe, pero nada no a kambia i sigui a base di echo.

Minister a duna di konosé ku Kòrsou a atendé entre otro ébola i ta atendé diariamente ku barkunan ku ta drenta Kòrsou ku ta laga hende abordo ku no tin mag di baha.

Pues no tin motibu pa pániko i e situashon ta bou di kontròl.