WILLEMSTAD.- E biaha aki entrega di lista di kandidatonan pa elekshon di dia 19 mart próksimo lo bai sin e folklor kustumbrá. Esaki ta loke ku sra. Sheryl Losiabaar di Konseho Supremo Elektoral a duna di konosé na EXTRA.
Ayera Konseho Supremo Elektoral di forma virtual a reuní ku e partidonan ku ke partisipá na elekshon pa parlamento próksimo. E desishon indiká ariba a keda trese dilanti na e partidonan.
Entrante djaluna awor, Konseho Supremo Elektoral lo “sali” for di Kranshi (Registro Sivil), i lo hasi WTC nan “kas”.
Tur aktividat entorno di elekshon lo tuma lugá den sala di eksibishon di WTC.
Un dje promé aktividatnan en konekshon ku elekshon ta entrega di lista di kandidatonan pa elekshon kual ta tuma lugá dia 21 yanüari di 9 or di mainta pa 4 or di atardi.
Sra. Losiabaar a splika ku riba e dia aki ta solamente tres hende dje partido por yega WTC pa entrega lista. No ta permití niun hende mas. Simpatisantenan no por subi a ni e lugá di stashoná outo di WTC.
Na momentu di entrega di lista, tur reglanan di COVID-19 ta na vigor, esta ku mester tin mondkapje bisti i mantené distansia di 2 meter for di otro.
E folklor ku tabatin pa ku entrega di lista, esta drùmbènt, kantidat di simpatisantenan di partido ta kompañá esaki bai entrega lista, lamentablemente e aña aki esei no ta posibel. Por bisa ku e entrega di lista lo ta unu sobrio.
Segun nos a komprondé ku ayera alrededor di 27 partido di kual 7 ku tin asiento kaba, a partisipá ne seshon di informashon. No ta ekskluí ku riba e dia aki sea mas partido polítiko lo entrega lista òf algun lo no aparesé na WTC.
Sostenementu di lista ku ta dia 30 i 31 yanüari tambe lo tuma lugá na WTC, sra. Losiabaar a terminá bisando EXTRA.