WILLEMSTAD.- No ta permití pa rekohé produktonan di konsumo ku tira na Landfill. Asina direktor di Selikor, Wesley Kook a sigurá ayera relashoná ku informashonnan ku ta sirkulá ku tin hende ta buska manera pa yega na e sitio i bai ku produktonan di konsumo ku a kaduká. Tin e storianan mas inkreibel riba retnan sosial riba e tópiko aki, pero e informashon aki ta básikamente inkorekto. Bèrdat ta ku Selikor ta permití pe hendenan rekohé sierto artíkulonan, entre otro pa resiklahe den e área ei, basta ku e no ta stroba trabou. Ademas, ta te na sierto ora di dia por hasi esei. "Pero produkto di konsumo si ta un otro storia", asina Kook a bisa.

Den e siman aki atrobe a surgi publikashonnan den sentido ku hendenan lo por pasa rekohé produktonan kaduká pa konsumo. E hechu ku e supermerkado Goisco a anunsiá ku e lo deshasí di mas ku 1500 kilo di karni tambe a lanta e preokupashon aki. E kompania a disidí pa deshasí di e karni ku tabata parti di e kòntròl di e tim multidisiplinario djabièrnè último bai kue djasabra. Komo ku e karni a keda mas ku 4 ora pafó di e frizer, a konsiderá ku lo no pone  e karni aki mas na benta pa públiko. E kompania a deshasí di e lote i a pone karni fresku den e negoshi.

Kook a bisa ku ta permití pa hendenan wak artefaktonan ku nan por re-usá/resiklá. "Ta un práktika di añanan largu. Pero nunka a permití pa esei tuma lugá riba produktonan ku nos ta konsiderá di konsumo. Nos tambe a tuma nota di e preokupashon ku tin hende ta buska den e artíkulonan di konsumo i trese nan bèk den e kadena di konsumo. Pa esei no sosodé, nos a traha riba un sistema ku for di adelantá e negoshinan konserní ta avisá nos i asina por evitá ku esei ta tuma lugá. E situashon aki debidamente tin nos atenshon", asina Kook a bisa.

Pa loke ta trata e material ku tin den Kaya Medio Ambiente, Kook a splika ku ta material pa resiklá. "Esei ta un sekshon apart kaminda hendenan tin bin kue shushi ku ta selektá kaba. Den nan no tin produktonan di konsumo, manera karni. Semper por tin insidentenan. Si nos no ta prepará adelantá, nos tin ku tuma e medidanan pa esnan ku ta rondia den e lugá no yega na e produktonan aki. Pero en bèrdat mas fásil ta pa nos ku ta avisá nos for di adelantá", asina Kook ta bisa. El a añadí ku ora esei tuma lugá tin gastunan èkstra, entre otro pa vigilansia òf pa traha un lugá kaminda hende no ta yega. "Ora anunsiá nos, nos ta destruí nan i despues dera nan", asina el a bisa.

Pa loke ta trata e posibilidat pa kima e produktonan, Kook a bisa ku si tin posibilidat lo por hasi esei. Pero einan tambe ta konta ku mester duna informashon adelantá. E ora ei nos por kima nan tambe", asina el a bisa.