WILLEMSTAD.- Parlamentario sr. Eugene Cleopa ta di opinion ku kaminata i deporte riba nan mes ta algu bon, e ta algu sano, pero hamas e mester ta algu ku ta pone hende na riesgo. Aktividatnan deportivo i kaminata riba tereno di airopuerto, kaminda lo tin di sera pista di Hato ta algu ku no por karga su aprobashon, i e ta kere asta ku ministernan Steven Martina i Zita Jesus-Leito tin di intervení. Segun Cleopa, Curaçao Airport Holding lo a duna Curaçao Airport Partners pèrmit i e último aki a haña pèrmit tambe di e departamento di aviashon sivil pa por sera airopuerto pa algun ora.
T’asina ku djasabra próksimo dia 2 di desèmber Curaçao Airport Partners ta organisá un seri di evento atlétiko riba pista di airopuerto, yamá “Run the Runway”. E evento aki lo kuminsá for di 06.30’or di mainta i lo enserá aktividatnan di atletismo i kaminata. A hasi un apelashon riba komunidat pa partisipá na e eksperensia úniko aki.
Segun Cleopa, pista di airopuerto no ta kos di hunga kuné, i e riesgonan ta haltu. Por ehèmpel si sosodé un situashon di emergensia kaminda un avion for di Boneiru lo mester aterisá, ta resultá ku pista di Kòrsou ta será pa kos di bon bida, i esei no por! Es mas, partisipantenan na e kaminata i otro aktividatnan deportivo inosentemente lo por laga kualke opheto kai riba pista. Ta algu ku lo por kousa daño na un avion, pa no papia mes di e riesgonan ku esei ta trese kuné. Na su opinion, for di punto di bista di seguridat no por akseptá ku ta tuma ningun riesgo. Avion ta un aparato masha vulnerabel.
Segun Cleopa, kisas hopi hende lo no gusta, pero e ta kere ku simplemente mester para e kaminata ei òf kambi’é di sitio. Resientemente kaba tabatin un alarma di bòm na Isla.
E por komprondé tur e bon intenshon ku lo por tin tras di e aktividat, pero den e mesun rosea mester para ketu tambe na e riesgonan ku esei ta trese kuné. I e riesgonan na su punto di bista ta hopi.
Lo ta interesante pa sa si VDC, polis i brantwer a duna konseho riba algu manera esaki.