WILLEMSTAD.- No ta sin mas Gerrit Schotte ta presentá na porta di prizòn pa bai sinta su kastigu.

Ayera e lider di MFK, Gerrit Schotte den un rueda di prensa a indiká ku djárason mainta e ta mèldu na porta di prizòn pa bai sinta e kastigu di 3 aña di prizòn. Schotte a bisa di ta spera di tende dje direktor di prizòn, sr. Urney Floran kiko e tin di hasi pa sinta su kastigu. Tambe Schotte  a hasi menshon ku lo a saka dos prezu peligroso for di den prizòn, pa traha lugá p’e bai será.

For di nos fuentenan na prizòn, EXTRA a komprondé ku no ta sin mas sr. Schotte por presentá na porta di prizòn pa bai sinta e kastigu ku dia 27 di novèmber a keda konfirmá na Korte di Kasashon.

Nan a bisa nos ku prizòn ta un instituto serio i ku a base di regla por tene un persona ei den. No ta pa loko ta drecha maleta i presentá na porta di prizòn pa sinta kastigu.

Tambe aparentemente nos fuentenan di prizòn a indiká ku no ta bèrdat ku a saka dos prezu peligroso pa traha lugá pa sera Schotte, manera e lider a indiká den e rueda di prensa ayera tardi.

“Kada ken ku haña kastigu di prizòn i ta den libertat mester tene kuenta ku ta Ministerio Públiko ta ehekutá e veredikto di korte, promé ku sera hende. Si e kondenado  yega porta di prizòn p’e sinta su kastigu, i prizòn atmití drenta bai su sèl, sin ku Ministerio Públiko a duna órden, por konsiderá esaki komo un akto kastigabel pasobra ta priva e hende di su libertat”.

Un konteo ku nos di EXTRA a hasi ta mustra ku normalmente un hende ku haña 3 aña ta sinta ménos ku 2 aña, ora e haña VI  ku ta un tersera parti, e por haña banchi si e komportashon den prizòn ta bon. Si tuma tur esaki na konsiderashon, anto Schotte lo por sinta 18 luna. Pero naturalmente tur kos ta den man di ministerio públiko. I manera indiká, nos fuente ta konsehá Schotte mèldu su mes na Ministerio Públiko pa bai sinta su kastigu i no na prizòn.