Manifestantenan a entrega karta na premier Rhuggenaath

WILLEMSTAD.- Awe mainta a tuma lugá e manifestashon ku Forsa Revolushonario Kòrsou a organisá. E grupo di siudadano preokupá a bai na pia di brùg, na parti di Punda, kaminda a hasi un yamada na tur esnan ku a pèrdè trabou, esnan den situashon difísil i hinter komunidat pa akudí pa asina forma un moketa kontra medidanan ku gabinete Rhuggenaath ta planiando pa tuma. Premier Rhuggenaath mes a sali pafó i a tuma un karta ku e grupo a entrega na su persona.

E asistensia no tabata gran kos, den sentido ku hopi hende no a duna oido na e manifestashon. E tres personanan ku ta para na kabes di e organisashon ku ta Lucho Rosales, Calvin Jansen i Tony Passial a hiba palabra splikando e hendenan ku a yega pa sostené e lucha, kiko ta e meta.

Minister presidènt a yama danki na e manifestantenan ku nan a tene nan akshon na un manera ordená, indikando ku e gobièrnu aki ta respetá ku tur hende tin derecho di ekspresá nan sentimentunan. Tambe sr. Rhuggenaath a mustra su komprenshon pa e preokupashon ekspresá. Calvin Jansen a pidi premier pa pasa man na kurason i kòrda kiko a pasa den pasado na Kòrsou, den tempu ku eks premier Pourier (q.e.p.d) a bini ku lei di apoderashon anto ku esei a kondusí na hopi problema den e pais aki. E kos ku mas a kousa doló ta  e echo ku su famianan mes a bandoná Kòrsou debí na e situashon ku a surgi. Premier Rhuggenaath a bisa ku su gobièrnu ta bon konsiente kiko a pasa den pasado.

FRK ta splika ku nan a organisá e protesta debí ku nan ta kategorisá e situashon aktual na Kòrsou komo unu hopi peligroso, pasobra gobièrnu lo tin intenshon usa podernan anti demokrátiko pa asina eliminá outoridat di Parlamento. Ta bon pa mustra ku no tabatin presensia di parlamentarionan, ku ta e representantenan di pueblo.