Profeshonalnan médiko ta ripití
WILLEMSTAD.- Plamamentu di e vírus di Corona no ta tuma lugá bou di muchanan na skol. Te ainda e kantidat di muchanan ku a keda infektá ta hopi abou. Un mucha masha difísil pa pega hende grandi, pasobra e no ta papia duru ku e por produsí “produkto” ku por bai pega otro hende. Te ainda sifranan ta mucha ku muchanan no ta fuente di kontagio, pero un mayor si por pega muchanan. Esaki ta loke ku epidemiólogo dr. Izzy Gerstenbluth a splika ayera den e seshon bibando ku sektor di enseñansa ku gobièrnu a tene.
Den e seshon di diálogo tabatin seis maestro/dosente kaminda nan a trese nan preokupashon pa ku dunamentu di lès na skol den e pandemia aki i spesialmente pa dia 28 di aprel ku skolnan ta habri.
Presente den e seshon aki ta dr. Jerry Semper na kabes dje Tim di Vakunashon i tambe Direktor di Servisio di Enseñansa i Siensia sr. Wladimir Kleinmoedig.
Kleinmoedig a splika kon ta evaluá pa habri skolnan. Gobièrnu ta tene kuenta ku konseho i kontribushon ku ta bini di eksperto i pone den práktika diario di enseñansa. E ta kere ku mester definí unda e tin e riesgo i pa ken. Basá riba esaki ta tuma medidanan korespondiente.
For di sektor di enseñansa ta kontinuamente nan ta den diálogo ku e tim stratégiko, tim di krísis, i e tim di epidemiologia pa sa kiko ta “safe” dentro di skol.
Dr. Jerry Semper di su parti a indiká ku mester bai definí kon vital profeshon di maestronan ta. Pa dr. Semper, profeshon di maestro/dosente ta super vital. Si mira e personal di kuido, e ta opvio ku nan ta vital den un pandemia. No tin ni kombersashon, ni evaluashon òf diskushon ku nan mester bai traha si òf no. Esaki ta hopi opvio ku nan mester bai traha tur dia. “Komo dòkter mi a traha den e pandemia sin a haña COVID te na momentu ku mi a vakuná. Esaki ta pa kada maestro tene den nan kabes ku tin un riesgo. Pero si hasi tur e kosnan korekto, no mishi ku kara, laba man ta mitigá e riesgo. Tin un grupo grandi ku ta pro pa bisa ban traha na kas. Sinembargo hopi mucha no tin posibilidat pa por tuma lès na kas pa falta di fasilidatnan elektróniko”, segun dr. Semper.
Tambe dr. Semper a splika efikasia di e vakunanan Pfizer i Moderna ku ta ser usa na Kòrsou. El a bolbe splika ku si bo ta vakuná, e chèns pa bira malu ta chikí, i si bira malu mes no ta bai hospital. I investigashon tambe ta mustra ku e chèns pa pega otro hende ku e vírus ta nulo. Spesialmente pa maestronan di skol e vakuna ta solushon hopi relevante, segun dr. Semper.
Dr. Gerstenbluth a duna di konosé ku e tin mas ku un aña ta papia ku sektor di enseñansa. Tin e riesgo ku e maestro/dosente por pega e mucha. Pero tambe e riesgo ku
den e grupo di enseñansa tin hopi dosente ku ta kai den grupo di riesgo esta hende di edat òf tin malesa króniko. Esaki ta e preokupashon i motibu dikon ta diskutí dor di hopi riesgo den enseñansa. A mustra ku sifra kiko ta e aporte di muchanan pa haña e malesa òf pa transmití e malesa. Muchanan no ta bira hopi malu, ni nan ta e grupo mayoritario ku ta transmití e malesa pa otronan. E grupo di riesgo mas grandi ta di adulto, di koleganan, mayornan, esnan ku ta den kontakto ku dosente, sin tapaboka, e epidemiólogo a splika.
E realidat ta di muchanan na skol di fundeshi, e riesgo ku nan ta transmití e malesa pa abo komo maestro ta limitá. Tur sifra ta mustra. E riesgo ta si e maestro/dosente no tene distansia, tene su mes na medida di protekshon, e ta kore riesgo di infektá otro. I por mira esaki den tur fishi entre otro den gremio di kompanianan i hasta den hospital. Ora di trabou ta tene na regla, ora di pause ta kita e bareranan, e ora ei ta infektá otro. E riesgo ku mucha no ta grandi, dr. Gerstenbluth a ripití.
E di dos argumento ta e riesgo ku maestro ta kore dor ta forma parti di grupo di riesgo. Tin kantidat grandi di hende ku ta kai den e faktor di riesgo, e poblashon di maestro/dosente ku edat haltu, hopi malesa di suku, preshon haltu etc. Si keda tene bo mes na regla ta posibel pa hasi e trabou “safe”.
Chèns pa mayor kontagiá un mucha ta mas grandi. Si wak tur sifra e chèns ta hopi mas abou kompará ku mucha pa pega hende grandi. Plamamentu dje vírus di Corona, no ta bou dje mucha, dr. Gerstenbluth a indiká.
(Foto File)
Laga un komentario