WILLEMSTAD.- Ministerio Públiko (OM) Kòrsou a laga hasi investigashon relashoná ku un denunsia ku a drenta na luna di yüni 2018 den kua a indiká ku un kaso di violashon di un mucha muhé menor di edat lo a tuma lugá dor di un trahadó di un internat na Kòrsou i dor di un tata di kriansa. For di e investigashon no a sali na kla ku e personanan en kuestion a violá òf a kometé un echo kastigabel.

Debí na esaki no a tuma lugá detenshon di e trahadó, ni e miembro di e famia di kriansa. Ministerio Públiko a invitá na dos okashon e persona ku a hasi e denunsia pa splik’e e desishon di OM. Tambe a entrega esun ku a hasi denunsia un karta ku un splikashon ekstenso.

Ministerio Públiko ta enfatisá un biaha mas pa por fabor atendé ku tipo di kasonan asina ku hopi koutela den prensa. E ta tacha e imágen di e internat en kuestion i ta tacha e tata di kriansa negativamente, pero tambe e ta tacha e víktima menor di edat.

Ku un persona ta konosí pa un violashon (seksual/físiko) di mucha, ta urgi pa trese esaki na konosementu di outoridat. Fiskal ta deklará ku mester laga polis hasi nan investigashon i no trese esaki den publisidat di e manera ku esaki a bai e biaha aki.