Osepa ta kanta moshon

WILLEMSTAD.- E suma ku ta pone disponibel riba presupuesto pa ofisina di akountent di gobièrnu, SOAB ta sigui oumentá tur aña bou di gabinete Pisas II. Pa 2025 a pone 21 mion florin pa SAOB riba presupuesto. Esaki ta motibu pa parlamentario pa partido PNP, Sheldry Osepa kanta un moshon durante tratamentu di presupuesto 2025 den reunion di Komishon Sentral di parlamento.

Osepa ta bisa di ta na haltura di un práktika ku el a papia di dje aña pasá kaba. “Ta pone sèn den SOAB, pero despues parlamento no sa kiko ta pasa ku e sèn aki. Asina ta skonde e derecho di parlamento pa kontrolá presupuesto. Di e forma aki ta okashoná ku no tin kontròl riba kiko ta pasa ku plaka di pueblo.’

E ta splika ku e forma di proseder aki no ta transparente i pueblo no sa kiko ta pasa ku su sèn. ‘Ta aki ta papia di Friends & Family.” E práktika aki segun Osepa no ta tuma lugá solamente na SOAB, pero el a tende ku tin mas fundashon i kompania di gobièrnu kaminda ta hinka sèn i kosnan ta pasa ku niun hende tin bista riba dje.

“Esaki ta mal gobernashon i ta lidia na korupshon paso bo no ta mir’é.” Debí na e práktikanan di mal gobernashon i posibel aktonan di korupshon Osepa durante reunion di Komishon Sentral di parlamento a kanta un moshon ku e lo entregá na momento ku trata presupuesto den reunion públiko. “Pasobra si no tin transparensia i tin korupshon, esei meresé un moshon. Pueblo mester sa kiko ta pasa ku su plaka.”

E parlamentario ta mustra ku ta hopi duru hende ta traha pa nan sèn i gobièrnu ta kita impuesto for di esaki pero no tin bista kiko ta pasa ku e sèn. “Partido Nashonal no ta aseptá esaki.” Mas aleu Osepa a pidi alabes klaridat riba pago di dividendo.

E parlamentario ta bisa ku den presupuesto no ta haña informashon riba pago di dividendo i kiko ta pasa ku e sènnan aki. “Di unda e sèn a pasa i unda e sènnan a bai i kiko a hasi ku e sènnan aki”, Osepa ta puntra.

Relashoná ku e desishon pa limpia registronan di servisio di impuesto i duna eksonerashon pa mas ku 3 miar florin na debe di impuesto, Osepa ta bisa ku e ke sa kuantu e debe di impuesto ta aktualmente, esta despues di a limpia e registronan. “Tin algu ku niun hende ta para ketu na dje. Esei ta ku semper lo tin debe di impuesto, semper lo tin montantenan grandi habrí na debe di impuesto, semper lo sigui kobra impuesto atrasá i semper lo tin ehersisionan kada tantu aña pa limpia registronan di servisio di impuesto. Esaki ta algu ku no ta bisa e pueblo.”