WILLEMSTAD.- Sekretario di estado Raymond Knops a splika ku e desishon ku Konseho di Minister di Reino a tuma awe mainta, esta pa duna un instrukshon na gobièrnu di Kòrsou ta debí na falta di bon gobernashon. Loke ta pasando den Parlamento di Kòrsou ta algu anti demokrátiko, pasobra ta impedí pa un miembro nobo, demokrátikamente elegí por drenta e kolegio. Esei ta loke sekretario di estado Raymond Knops a deklará despues di reunion di Konseho di Minister di Reino.

EXTRA a puntra kiko ta bai pasa awor den práktika. Minister plenipotensiario Anthony Begina den deklarashon na EXTRA a duna di konosé ku gobernador di Kòrsou, sra. Lucille George-Wout a hasi petishon na Reino via di e sekretario di estado pa duna un instrukshon na Kòrsou. Esaki den práktika ta enserá ku na lugá ku den Parlamento mester forma kuórem pa despues kontrolá e kredensialnan di e miembro nobo pa despues manda e informa aki pa su ekselensia gobernador, den e kaso aki gobernador su gabinete mes ta kontrolá e kredensialnan i despues e persona ta presta huramentu serka gobernador.