WILLEMSTAD.- No tin motibu di pániko pa falta di kombustibel ta loke ku promé minister Eugene Rhuggenaath a duna di konosé durante rueda di prensa ayera relashoná ku e situashon ku a surgi entre PDVSA i ConocoPhillips. Gobièrnu ta aktivá su plan pa mitigá efekto di e situashon aktual.
Promé minister a indiká ku djasabra último a reuní ku sindikatonan di refineria i tambe mas despues nan tabatin un Konseho di minister, kaminda a disidí pa aktivá e plan di kontingensia ku tin. Esaki ta enserá ku a pone e Task Force Energia den funshon pa desaroyá un plan di kontingensia. Den e Task Force aki tin Curoil, Aqualectra i refineria di Kòrsou.
E Task Force ta atendé e situashon agudo ku por surgi pa ku utilidat.
Promé minister a bisa mas aleu ku e ta hopi orguyoso di mira kon e kompanianan den kadena di energia ta traha ku otro pa seguridat i interes di pais Kòrsou.
Manera ta konosí e kompania merikano ConocoPhillips a pone beslag riba vienes di PDVSA pa un logra di haña un suma di 2.000 mion dòler.
Promé minister a indiká ku for di siman pasa abogadonan di kompanianan di gobièrnu a tuma kontakto ku abogado di ConocoPhillips aki na Kòrsou pa papia dje situashon. Hasta gobièrnu a bai asina leu i ta dispuesto na aserká ConocoPhillips pa papia dje impakto di e beslag ku e kompania a pone tin pa ku e pueblo di Kòrsou. Esaki ounke e no ta un asuntu di gobièrnu. ‘Meskos ku a sosodé na Bonaire, nos lo hasi aki tambe, kaminda nos ta dispuesto na papia ku ConocoPhillips pa nan laga krudo bai planta pa por tin utilidat pa e pueblo. Meskos ku loke ta pasando aktualmente na Bonaire’.
Pa loke ta trata e produkshon di Refineria Isla, promé minister a indiká ku esaki ta hopi abou, kasi nulo. Segun plan akordá, CRU su plan di reparashon lo ta kla pa fin di mei, i asina por duna stom na refineria ku por start e plantanan. E promé mandatario a indiká ku gobièrnu lo duna tur koperashon ku tin di su parti pa e planta por start.
Na mes momentu ta trahando riba e senario pa riba korto plaso un di dos kompania djòin PDVSA i asina lanta e produkshon i tambe pa yuda e kompania venezolano wanta te ora nan yega desèmber 2019.
Ta papiando ku dos kompania di kual un di nan ta Britisch Petroleum ku for di tempu di GZE a introdusí esaki na Kòrsou.
No tin beslag riba Refineria Isla i nan por sigui paga salarionan. Gobièrnu tin konfiansa ku PDVSA ta sali for di e situashon, pero ounke nan no ta komuniká ku gobièrnu, gobièrnu ta sòru pa kontinuidat i tambe kupo di trabou na refineria. Via di konsulado i otro kanalnan diplomátiko via di Ulanda ta trata di haña kontakto ku PDVSA riba e situashon di beslag.
Den kaso ku PDVSA no por operá refineria, komo gobièrnu mester eksplorá tur posibilidat pa kontinuidat di e refineria. E situashon ta keda unu kompliká mirando e kontrato di hür ku tin te na 2019. Gobièrnu por terminá e kontrato si mira ku PDVSA no por mantené e refineria operashonal. Si gobièrnu kibra e kontrato, algun minütnan despues mesora mester tin un otro operadó pa tuma e refineria over, ta loke ku sr. van Kwartel di Refineria di Kòrsou a indiká por último.