WILLEMSTAD.- Den e último periodo tabatin hopi atenshon pa un tankero super grandi ku a kuminsá yena ku awa i a lèn di un banda na kosta di Venezuela. E tankero FSO Nabarima ta yená ful ku krudo pisá pero e barku su situashon ta pésimo despues di hopi tempu sin haña e mantenshon nesesario.

Gobièrnu di Trinidad & Tobago ayera a bisa den un deklarashon ofisial ku no tin motibu pa drenta den pániko. Minister di Energia di Trinidad & Tobago, Franklin Khan, a duna di konosé ku e tankero ta stabil. Khan a bisa ku e zeta for di FSO Nabirama ta wòrdu traspasá na tankero Icaro. Esaki ta wòrdu hasí dor di Venezuela, Khan a bisa.
Diferente pais den Karibe resientemente a mustra nan preokupashon tokante e tankero. Si e barku senk e por kousa daño ekológiko ireparabel na kosta di e pais bisiña i tambe na paisnan den Karibe, Aruba, Boneiru i Kòrsou, asina ekspertonan marítimo ta duna di konosé.
Resientemente parlamentario Giselle Mc William a pidi atenshon pa e situashon. Mc William ta preokupá ku e situashon ‘rondó di e barku yená ku 1.3 mion tòn di krudo di Venezuela den laman Karibe’.
Mc William a bisa ku ‘segun esnan ku a mira e tankero aki di aserka ta atvertí ku un ora pa otro si bin un mal tempu e tankero ku ya kaba ta di lèn un banda por resultá den un desaster pa islanan den Karibe inkluso Kòrsou ku lo afektá medio ambiente prinsipalmente e sektor di peska i Turismo.’
Den kuadro di esaki Mc William a hasi preguntanan na Minister di Asuntunan General. E ke sa si gobièrnu ta vigilando e desaroyo aki? I kiko konkretamente gobièrnu di Kòrsou por hasi riba nivel di Reino Hulandes.