WILLEMSTAD.- Korte di apelashon no a haña ku tin sufisiente motibu pa ekspropiá e kantidat di NAF 139.338,- for di e akusado Edelberto Martina (42), manera Ministerio Públiko a indiká.
OM kier a ekspropiá 139 mil florin for di Martina, despues ku durante un entrada hudisial na kas di Martina dia 26 di febrüari 2019, polis a haña un kantidat di foto di hopi droga, arma, aparato pa pisa i un kantidat di plaka den su telefòn.
Segun Ministerio Públiko, abase di e kantidat di fotonan di plaka ku a haña den e akusado su telefòn, nan a hasi un kalkulashon i sospechá ku ta trata di plaka di krímen organisá.
Banda di esaki, polis a konfiská arma di kandela, 250 gram di mariwana i 2 gram di koka den e bibienda di Martina.
Riba e fotonan ku polis a haña den e telefòn, e akusado a bisa ku nunka el a skonde nada, paso e no tin nada di skonde.
El a bisa ku ta trata di potrètnan bieu i e ta den vários grupo ku konstantemente ta keda manda tur tipo di foto.
E akusado a splika ku e kantidat di sèn ku tin riba e foto den un forma rondó, ta forma di un bolo ku el a laga traha dia el a hasi 40 aña, ku a kost’e 325 florin.
El a bisa e ta atmití ku tabatin algun potrèt ku el a saka ku hopi sèn, pero ta plaka di su vehíkulo, ku el a bende. Tambe el a bisa di a haña sèn di seguro.
Segun Martina, e ta saka foto pa e mes tin nan i no pa pone riba “facebook” òf media sosial pa broma.
Mas aleu el a duna di konos’é, ku e ta atmití ku e 250 gram di mariwana ku a haña den su kas, tabata pa propio uzo di e i su kasa i e 2 gram di koka tabata pa e hòmber ku a fèrf kas pe.
E akusado a bisa ku si polisnan a yega bati na su porta i indiká ku ta polis, e lo a habri porta sin resistí, paso e no tin nada malu ta hasi.
Hues di korte di promé instansia no a kere e historia di Martina i a bai di akuerdo pa ekspropiá e montante di 139 mil florin.
E akusado a apelá e sentensia paso e no a bai di akuerdo ku e veredikto.
E tribunal di korte di apelashon, a bisa den su veredikto ku e no ta bai di akuerdo ku e sentensia di korte di promé instansia.
Segun e tribunal, no tin sufisiente indikashon ku e akusado ta involukrá den negoshi di droga, arma i ku e tin ganashi ku esakinan.
E tribunal a bisa mas aleu, ku no por konkluí esaki abase di e fotonan di droga, arma i e kantidat di sèn ku a keda haña den e akusado su telefòn. Segun e tribunal, ta di sumo importansia ku ta trata di fotonan bieu.
Mirando tur esakinan e tribunal a haña ku no tin sufisiente motibu pa ekspropiá plaka for di Martina i ta deklará e sentensia di korte di promé instansia nulo i ta apsolvé e akusado di ekspropiashon.