Selebrá Pasku i kambio di aña di otro forma

WILLEMSTAD.-Premier Eugene Rhuggenaath durante di e briefing riba situashon di Covid-19 na Kòrsou a para ketu pa manda palabranan di forsa na famia di personanan ku a fayesé debí na Covid. Sr. Rhuggenaath a bisa ku por a nota ku e sifranan di hendenan kontagiá a baha den último dianan, sinembargo esei no ta motibu pa habri man i laga bai. Ta muchu tempran pa saka konklushon a base di sifranan di último dianan.

Gobièrnu di Kòrsou a disidí ku despues di evaluashon no tin motibu pa eskala, bini ku mas medida, pero tampoko no t asina ku por kita medidanan. Premier a bisa ku e aña aki Kòrsou no por pasa dianan di fiesta bou di mesun situashon di ántes. Nan tin oido pa gruponan pero ta tuma desishon balansa. Tur medida tei pa kuida bida di hende i na mes momentu ta tene kuenta ku aspektonan sosio ekonómiko.

Pa loke ta trata selebrashon den fin di aña premier a bisa ku ta permití benta i uso di vürwèrk pero priva so, esta pa kasnan di famia. Fiesta di pagara i show di vürwèrk di kompanianan no ta posibel e aña aki. Hotèl por sende vürwèrk pa su wéspetnan anto solamente pa kambio di aña. Premier a pidi komunidat pa pensa di forma kreativo e.o sistemanan virtual pa saluda famia den e fin di aña aki. Mas detaye den edishon di EXTRA.