WILLEMSTAD.- No tin ningun desishon pa oumento òf adaptashon di Passenger Facility Charge (PFC) konosí den pueblo komo ‘airport tax’, esei minister sra. Zita Jesus-Leito a duna di konosé na EXTRA. Na Aruba si a anunsiá ku lo tin oumentu di e PFC di forma drástiko entrante promé di yüli 2018.

Ta asina ku kada tres aña ta tempu pa tira bista i chek si te ainda e PFC ta kumpli ku su meta. Den e kuadro ei ta asina ku departamentonan di ministerio di Tráfiko, Transporte i Planifikashon Urbano (VVRP) ta hasiendo análisis riba e desaroyonan, pero manera indiká minister di VVRP a bisa ku no tin niun desishon.

Importante ta ku e entrada ku e PFC ta generá mester por kubri gastunan di e aeropuerto i otronan. Bosero di Curacao Airport Partners ta bisa ku CAP ta duna konseho a base di nan análisis. CAP ta enfatisá ku e PFC no ta pa aeropuerto so pero tambe pa kubri toren di kontròl i aviashon sivil.