WILLEMSTAD.- Hues Martinez ayera a disidí ku no tin niun nesesidat pa gobièrnu laga un grupo venezolano indokumentá den libertat. Segun e abogadonan di e grupo di venezolanonan, ta será den sirkunstansia inhumano i humiliá.

Hues den su veredikto ta skirbi ku dia 26 di aprel el a bishitá e departamento na unda e hendenan indokumentá ta keda. Pa motibu di rekonstrukshon algun hende indokumentá mester  a keda  temporalmente den sèlnan, pero nan no tabatin kontakto ku e prezunan. Segun hues e hendenan indokumentá tin un lugá limpi, kuminda tres bia pa dia, pasta di djente, habon, shampo, produktonan higiéniko pa damanan. Nan tin oportunidat pa bai gym, wak televishon, nan tin un lugá pa papia ku famianan. Segun e abogadonan Shalten Hato i Molly Steward durante tratamentu di e kaso no tin niun motibu pa laga nan liber. Hato i Steward ta abogadonan di minister Quincy Girigorie. Hues Martinez tin e mesun opinion. ‘Por ta ku e hende indokumentá no ta gusta e lugá, pero e situashon sigur no ta ni inhumano, e venezolanonan no ta wòrdu humiliá tampoko.’

Dia 23 di aprel Korte Oropeo di Derecho Humano a disidí ku e grupo por keda na Kòrsou. E tempu ei 33 hende indokumentá a entregá keho na Korte Oropeo. Aworakí tin solamente shete persona ku ta den e baraknan. Tur e otronan a hui algun dia atras for di barak.

E grupo di shete awor por keda na Kòrsou den e barak. Nan tin ku keda den baraknan te minimal 23 di mei. E dia ei Korte Oropeo lo tuma desishon si nan lo sigui ku e kaso òf nan ta duna e kaso bèk.

E grupo di indokumentado a yega Kòrsou dia 11 di aprel ku un barku for di Venezuela. Nan a wòrdu arestá i a keda den kustodia.