WILLEMSTAD.- Wes a diktá sentensia ayera den e kaso ku eks miembro di MFK Dean Rozier a entamá kontra di su tres eks koleganan di MFK. E kaso aki a start for di 2013 i ta awor numa el a keda kla. Pasombra tantu Rozier komo Gilmar Pisas i Rudney Garmes a pidi pa korte diktá sentensia awor si. Segun wes esaki ta nifiká ku partidonan no ke tuma nota dje dokumentashon penal.

Den e sentensia ku wes a diktá, Rozier a haña rason riba un punto só, kaminda e eks-parlamentarionan no por a probá ku enbèrdat Rozier a trata di kumpra nan. Den e sentensia wes a indiká ku kombersashonnan di mail ku a bai bin entre e eks parlamentarionan di 2010-2012 di MFK, tabatin mal kontentu den e partido. E mal kontentu entre otro tabata pa e forma di funshoná di nan dos ministernan Jacinta Constancia i George “Jorge” Jamaloodin.

Pa loke ta trata e otro petishonnan ku Rozier a hasi pa e daño ku el a sufri pa dañamentu di su bon nòmber, wes no a rekompens’é den esaki. Di akuerdo ku abogado Bonapart ku tabatin defensa di sr. Rozier ku  e tres parlamentarionan di MFK (2010-2012) no por a pruebá ku Dean Rozier a trata di kumpra nan na 2012. E akusashonnan falsu a keda bisa na aña 2012 dor di e miembronan MFK i MFK a usa esaki pa por a skonde tras dje echo ku tabatin problema interno ku a pone ku e Gabinete a kai.

Pa rekordá e tempu ei e gobièrnu tabatin 11 sosten den parlamento. Eugene Cleopa a kita su sosten. Gabinete Schotte a bira demishonario i Schotte a disolvé parlamento i a yama elekshon nobo. Despues Rozier tambe a bandoná Gabinete Schotte. E tres eks-parlamentarionan MFK (2012) a bisa ku Rozier a trata di kumpra nan.  Wes a bisa esei ta straño paso si e kier tumba gobièrnu Rozier no tabatin mester di su tres koleganan parlamentarionan. Pasombra ya e gobièrnu a kai kaba.