WILLEMSTAD.- Ministerio di Hustisia no tabatin niun otro opshon pa kanselá diferente proyekto. Asina minister di Hustisia Quincy Girigorie a bisa djaweps último durante reunion ku parlamento tokante tratamentu di presupuesto pa aña 2021. Segun Girigorie no tin sèn mas pa diferente proyekto debí na e situashon finansiero hopi difísil ku nos pais ta den. Minister Girigorie ta buska tur manera pa tòg por sigui ku diferente proyekto.

Por ehèmpel rekonstrukshon di kushina di Sentro di Detenshon i Korekshon Kòrsou (SDKK), ku ta un di e proyektonan ku no por sigui awor. A plania 800.000 Naf pa e proyekto. Pero debí na e situashon malu  e sèn no tei mas, Girigorie a bisa. Segun e minister di Hustisia intenshon ta ku e proyekto ta sigui den aña 2021. Te ainda  kompania di ‘catering’ ta duna kuminda pa e prezunan.

Tambe Girigorie a bisa ku no tin sèn na e momentu aki pa limpia e tereno di ‘Jeugdinrichting Curaçao’ (JJIC)’ Girigorie a bisa ku den aña 2021 e lo deliberá ku diferente organisashonnan i institutonan pa sòru ku e trabou por sigui den aña 2021.