WILLMESTAD.- No tin splikashon pa e echo ku despues di 4 aña di gobièrnu Pisas II ainda no a eliminá e lei pa kòrta ku 12,5 porshento den kondishon laboral di ámtenarnan i trahadónan igual. Kolaboradó di frakshon di partido MAN, Eugene Cleopa ta bisa ku ta kla den tur hende su memoria kon partido MFK tabata enérgikamente kontra e lei di 12,5 porshento.

“Tempu MFK tabata den oposishon nan a fomentá wèlga kaminda ke a sende Kòrsou na kandela, a bòltu outo di polis, kibra bakinan di mata den Punda i kibra porta di Fòrti pasobra tabata kontra e lei pa kòrta ku 12,5 porshento den kondishon laboral. P’esei partido MAN-PIN no por komprondé ku despues di kasi kuater (4) aña di gobernashon di partido MFK, ainda no a eliminá e lei pasobra palabrashon tabata ku despues di e pandemia di Covid-19 lo eliminá e lei aki.”

E ta splika ku a pasa e lei a base di solidaridat pa asina gobièrnu por a haña sosten di likides durante e krísis ekonómiko finansiero okashoná pa e pandemia di Covid-19. Esaki miéntras ku e ámtenar no a bai atras na salario i tabatin garantia ku e lo no pèrdè trabou. “Entretantu gabinete Pisas a usa e sosten di likides ku a haña for di Hulanda por kompletu i partido MAN-PIN awor ta eksigí gobièrnu Pisas pa eliminá e lei konforme palabrashon, esta entrante promé di yanüari 2023.

E sosten di likides tabata nesesario pa duna ayudo na tur trahadó den sektor privá ku pa motibu di e krísis a pèrdè nan trabou, “Gobièrnu di e tempu ei tabata ku su lomba kantu di muraya i mester a bai di akuerdo ku e kondishon ku Hulanda a pone pa e fris su propio gastunan di personal pa asina por a haña sosten di likides i duna ayudo na komersiantenan i siudadanonan pa medio di insentivonan manera e areglo di NOW i paketenan kuminda i produktonan higiéniko  i suma di plaka.”

Partidonan di oposishon sinembargo a kritiká i akshoná kontra e lei di 12,5 porshento i tur otro areglo nesesario ku gobièrnu a bini kuné manera e lei di emergensia, Cleopa ta sigui trese dilanti. “A yama e lei di emergensia un lei pa sera boka di pueblo i lei pa drenta kas di pueblo, pero ora ku gobièrnu di promé minister Gilmar ‘Pik’ Pisas a tuma asiento nan a prolongá e mesun leinan aki ku nan a kritiká.” Esaki pa Cleopa ta otro prueba ku MFK den práktika no ta kumpli ku palabrashon i promesanan ku e partido mes a hasi den kampaña.

Cleopa un biaha mas ta enfatisá ku MAN-PIN ta eksigí gabinete Pisas II pa eliminá e lei di 12,5 porshento pa kaba pasobra nan ta lat riba tur oloshi.

Foto:

...Eugene Cleopa...