WILLEMSTAD. - Tin un área den Ministerio di Hustisia ku tin hopi reto, loke ta pone ku e ministerio no por move, pa motibu di hopi opstákulo dor di un kantidat di desaroyo, manera e krísis humanitario kontinuo di Venezuela i tambe e situashon finansiero delikado di pais i e efekto di coronavirus.

Mester indiká ku fluho di venezolanonan indokumentá  ku ta yega Kòrsou, tin un preshon enorme riba e aspekto finansiero di pais i tambe e kapasidat di hende den e sektor di mantenshon di órden i seguridat.

Un di e retonan ta, ku no tin kapasidat pa akomodá e indokumentado nan den SDKK i no tin un bista tampoko di un fin di e fluho di indokumentado for di Venezuela.

Esaki ta hasi difísil pa por proyektá medionan pa por realisá metanan ku Ministerio di Hustisia ke realisá den e añanan benidero.

Segun e dokumento, tin un bon koperashon entre di e diferente ministerionan i tambe un impulso finansiero di parti di Ulanda pa por yega na optimalisá e kapasidat di detenshon.

Pero te ainda e Ministerio tin di dil ku e efektonan di coronavirus. Pa motibu di e efekto aki tin un preshon enorme riba e tiki personal pa traha, huntu ku limitashon di ku kuerpo Polisial ta dil kuné.

Desèmber último un grupo grandi a reiterá for di kuerpo polisial boluntariamente, loke ku ta hasi e situashon den e sektor hudisial mas kompliká. Esakinan ta algun di e retonan ku e kadena hudisial tin di atendé kuné.