WILLEMSTAD.- Nòmber di Kòrsou lo figurá entrante djadumingu 19 yanüari awor riba manga di e unifòrm di Ajax. Esaki pa tur wega ofisial ku e ekipo di futbòl Hulandes ta hunga den kompetensia Hulandes, Kopa KNVB i kampionatonan Europeo di Eufa manera Champions League i Eu.

Ofisina di Turismo CTB a firma un kontrato ku Ajax pa un periodo di 3 aña pa asina por figurá riba shùrt di e ekipo. Minister di Desaroyo Ekonómiko, Giselle Mc William a anunsiá e kontrato promoshonal entre Kòrsou i Ajax bisando ku ta saliendo pa Hulanda.

Djadumingu awor e minister lo ta presente na e wega di Ajax pa inougurá nòmber di Kòrsou riba e manga. E minister ta bisa ku e kontrato promoshonal aki no solamente ta interesante pa e merkado Hulandes ku ta e merkado turístiko mas grandi di Kòrsou, pero tambe e merkado Oropeo den su totalidat.

Den afan di Kòrsou pa sigui duna empuhe na sektor turístiko di Kòrsou ta wak no solamente Hulanda pero demas merkadonan Oropeo potensial.