WILLEMSTAD.- Norman Moron lo haña e premio prestigioso Boelie van Leeuwen di e aña aki. Ta trata di un distinshon ku Gobièrnu di Kòrsou ta duna kada dos aña pa honra e legendario eskritor i pensadó kurasoleño aki. Lo entregá e premio na Norman Moron djaweps awor durante un seremonia na Hotèl Avila riba e dia natalisio di Van Leeuwen. E último ganador di e premio tabata e periodista Mariano Heyden.

Informashonnan ku EXTRA a haña ta hasi menshon ku tabata e intenshon pa mantené e ganador sekretu te djaweps awor pero pa motibu aparentemente di un omishon, e komishon ku ta organisá e entrega di e premio a manda un invitashon pa e seremonia ku nòmber di e ganador riba dje. Esei a pone ku ya kaba e nòmber ta konosí den diferente sirkulo.

Norman Moron ta un persona ku no mester di introdukshon i ta konsiderá un di e pianistanan ku mas a hasi impakto di nos sosiedat den último dékadanan. Te ainda Norman Moran ta aktivo na un gran kantidat di aktividat di Kòrsou tantu komo solista komo ku su mesun grupo.

Gobièrnu di Kòrsou a anunsiá resientemente ku a restrukturá entrega di e distinshonnan mas importante di Kòrsou manera Premio Boelie van Leeuwen, Premio Cola Debrot i tambe Premio Charlwin “ Broertje” Marshall. E tarea a bai pa Konseho Kultural Kòrsou. Entrante e aña aki pues Konseho Kultural Kòrsou a haña e enkargo relashoná ku preparashon di e prestigioso “Premio Boeli van Leeuwen”. Promé ku e aña aki e preparashonnan tabata realisá pa un asina yamá Adviesraad Premio Boeli van Leeuwen, ku na aña 2017 no por a hasi e trabou. A lanta e ora ei un komishon ad-hoc pa e Premio na 2017. Miéntras tantu gobièrnu a yega na un entendimentu ku Konseho Kultural Kòrsou pa e órgano aki tuma e enkargo di e Premio aki i otronan den futuro.

Premio Boeli van Leeuwen ta un premio ku for di aña 2009, ta otorgá kada dos aña na un òf mas persona òf organisashon ku a alkansá prestashon intelektual ekselente riba tereno kultural, hurídiko, gubernamental, sosial òf periodístiko. E prestashon di e ganador mester ta unu ehemplar, e mester inspirá i habri bista di komunidat i e mester surpasá frontera di Kòrsou. Entrega di e premio ta tuma lugá riba 10 di òktober, kada dos aña, riba e fecha natal di Boeli van Leeuwen. E siguiente Premio Boeli van Leeuwen ta e siman aki dia 10 òktober 2019.

Gobièrnu di Kòrsou a anunsiá ku banda di e Premio Boeli van Leeuwen ku a otorgá pa promé biaha na 2009, Konseho Kultural Kòrsou tin den su enkargo alabes Premio Cola Debrot. Premio Cola Debrot ta keda otorgá den un di e siguiente kategorianan: arkitektura, arte visual, baile, folklor, literatura, músika, teater of siensia.

Alabes Konseho Kultural a risibí e enkargo di e Premio Charlwin “ Broertje” Marshall, un premio pa hóben i riba tereno kulinario, ku a otorgá pa promé biaha den mei di e aña aki