WILLEMSTAD.- Tabata mas kla ku di dia, ku e kaso kaminda a haña un homber den pos, ta un krímen. Esaki despues ku a konstatá ku a maltratá e homber aki di forma severo, pa despues mara su pianan ku un blòki, i bent’e den un pos dilanti di Festival Center na Kaminda George Willems.

Ayera polis a konfirmá di forma ofisial ku ta trata aki di un krímen. Pues un kaso mas di asesinato ku ta keda registrá i pa loke ta e aña aki ta bira e di 5 asesinato.

Djamars alrededor di binti pasa di kuater, Sentral di Polis a risibí informashon ku den área di Kaminda George Willems, nèt otro banda di kaminda di Curaçao Festival Center, tin holó basta desagradabel ta sali for di un pos i tambe tin basta muskita bulando ei banda. Famianan ku tin un ser kerí pèrdí pa basta dia, a sali pa bai buska den direkshon for di unda e holó i tambe e muskitanan tabata. Den e pos a topa tambe ku kurpa di un persona, ku tur indikashon ku ta nan ser kerí. No por a wak esaki bon, ya ku e kurpa tabata den estado di deskomposishon kaba.

Ta trata aki di un pos di algun meter hundu i ku aparentemente lo tin poko awa tambe den dje. E pos  ta keda den besindario di un kas, riba un tereno basta grandi, kaminda diariamente tin hende ta frekuentá. Remarkabel ta ku algun meter leu di unda e pos ta, a haña algun pertenensia manera telefòn i kèts di e persona ku nan ta kere lo ta den e pos i ku famianan tabata buska.

Despues di basta ora ku a logra saka e kurpa sin bida, famianan a konfirmá ku ta trata di e hòmber Norris Teodosio Rosa nasé na Kòrsou dia 23 di Mart 1957, ku tabatin algun dia pèrdí.

Investigashon den e kaso aki ta kontinua.