Ora èkstra pa entrega di lista

WILLEMSTAD.-Nos a drenta e siman den kua partidonan ku ke partisipá na elekshon 2021 mester entregá nan lista. Despues di entrega nan lista i Konseho Supremo Elektoral(KSE) kontrolá ku tur rekisito ta na òrdu e partidonan aki por partisipá den e preelekshon dianan 30 i 31 di yanüari próksimo. E siman 21 di yanüari, esta djaweps tur partido ku ke partisipá na elekshon mester a entregá nan lista na KSE.

Sheryl Losiabaar miembro di KSE enkargá ku komunikashon a splika ku ainda KSE no sa ni por bisa eksaktamente kuantu partido tin pa elekshon 2021. Tur dia nan ta risibí yamada, petishon pa informashon di agrupashonnan polítiko nobo ku ta hasi pa KSE difísil pa antisipá kiko lo bai sosodé dia 21 próksimo. Pues e informashon eksakto i korekto, nan por duna esei djaweps 21 di yanüari. E trabounan den kuadro di elekshon 2021 ta kanando i e bia aki mester tene kuenta ku Covid-19. Den e kuadro ei a tuma medidanan pa evitá aglomerashon, kontagio i plamamentu di e vírus, hopi kustumber ku nos tin relashoná ku elekshon, no por tuma lugá mas. Pa motibu di Covid-19 i Entrega di Lista di Kandidatonan ta tuma lugá na WTC den Exhibition Hall. Otro kambio ta e orario, e bia aki e orario pa por entregá lista a bira 9or pa 6or. (Lei tabata bisa 9or pa 4or). (PB 2021 no 5 a keda publiká 15 di yanüari 2021).

Máksimo 3 persona di kada partido por drenta den sala pa entregá lista kumpliendo ku e medidanan di Covid-19 stipulá. Algu ku sigur lo ta un kambio grandi ta e folklor di músika, ambiente ku ta rondoná e partido na momentu di entrega di lista. E folklor aki no por tuma lugá mas, asina KSE ta informa.