Futbòl, futbòl, futbòl... e gritu deportivo, den su forma original, pa anunsiá wega di futbòl no tei mas. Den oranan di mardugá di djasabra 4 di novèmber Mirco Colina a fayesé. Pa vários aña Mirco tabatin su kolumna di futbòl "Den Kayent'i Wega", den EXTRA,mediante kua e tabata duna informashon di deporte, pero muy en partikular di su pashon ku ta futbòl.

Despues ku e mes den su temporada mas hóben a hunga e.o. den Victory Boys, Mirco ku tempu a yega na su mes ekipo Buena Vista. Un tempu e tabata den direktiva di F.F.K. i ketu bai ta delegado den representashon di ekiponan di 2da i 3er divishon.

EXTRA lo rekordá Mirco pa su pashon ora di skirbi i papia di futbòl komo tambe pa su remarkenan chistoso sin importá unda bo top’é. Futbòl, futbòl,futbòl... Mirco, sosegá na pas.