WILLEMSTAD.- Presidente di Aliansa kontra violensia doméstiko i abusu di mucha, Jeanne Henriquez, djárason último durante un konferensia di prensa a bisa: ‘Nos mester puntra nos mes si berdaderamente nos ta biba den un estado di derechi na Kòrsou.’
E konferensia di prensa a toka di un situashon na unda un mama Kolombiana ta na Kòrsou pa kasi 7 luna. E no mag di papia ku su yu den privá ni brasa su yu muhé di 9 aña.
Ya kaba ta tin dos huisio den korte tokante e kaso un kort geding i un bodemprocedure. Segun Aliansa den e último kaso hues a bisa ku e lo duna sentensia te fin di òktober. ‘Miéntras tantu mama por papia ku su yu solamente via di videocall. E kombersashonnan no ta privá. Diferente organisashon por vigilá e kombersashonnan. Aki na Kòrsou, hasta si un mama hasi un akto kriminal, e tin e derechi di papia su so ku su yu. Ta hopi derechi di mucha a keda violá ku bendishon di korte di Kòrsou; usando un dokumentu tradusí pa Voogdijraad ku yen fayo den dje’, asina Henriquez a bisa.
Aliansa den e konferensia di prensa a bisa ku nan ke hustisia pa e mama. Segun Aliansa ta trata di un kaso di inhustisia grandi. Segun Henriquez mester bin un diskushon nashonal tokante esaki. Pero na promé instansia e yu mester bai bèk na su mama. ‘Cora mester bai bèk serka su mama’.
Durante e konferensia di prensa Henriquez a puntra: ‘Kon ta posibel ku
maske Voogdijraad i tambe huesnan ta na altura ku e dokumentu no ta korekto ta sigui usa e dokumentu aki? Kon ta posibel ku huesnan por yega na un sentensia den kua ta keda prohibí mama pa tin kontakto físiko ku su yu? Kon ta posibel ku hasta fiskal ta sigui legalisá un kos ku no ta korekto sin hasi investigashon? Si ta asina ta un estado di drechi, e futuro di nos yunan ku no tin bos pa defendé nan asuntu ta pinta hopi malu.’
E pregunta ku Henriquez ta hasi ta: ‘Kuantu mas mester sigui aseptá ku hasta korte no ta tene su mes na interes di mucha den su huisionan?’