Nos naturalesa ta interesante sigur!

Carmabi Foundation ta un organisashon sin ganashi na Kòrsou, ku ta dediká su mes na investigashonnan sientífiko, maneho di naturalesa i edukashon di medio ambiente. Carmabi ta traha riba kuater departamento respektivamente edukashon, investigashon di marina i terestre, i ‘consultancy’ maneho di parke.

Riba kada último djasabra di luna lo tin un di e hefenan di e departamentonan di Carmabi ku lo konta algun  historia interesante pa sa di e bunita naturalesa di Kòrsou.

Ku regularidat tin preguntanan ta keda hasí na Carmabi edukativo riba bestianan den nos naturalesa. Awe Cor Hameete hefe di e sekshon di edukashon lo konta riba e kuater preguntanan mas hasí di “Hagedissen” òf manera ta yam’é den boka di pueblo lagadishi.

Pregunta 1; Gekko (Pegapega) ta peligroso?

Ba yega di mira un Gekko den kas? Bo ta rekonosé mesora, e ‘Hagedissen”/lagadishinan aki ta kologá kabes abou riba muraya òf plafòn. Ku nan pianan ku parse “zuignapjes”, nan ta e akrobatnan di tur reptil.

Nan ta kana sin difikultat riba muraya i por mira nan prinsipalmente anochi ora bira skur. Gekko ta bestianan di anochi i p’esei nan tin wowonan grandi pa asina nan por wak bon den skuridat. Nan ta kome prinsipalmente insektonan manera muskita, sangura i kakalaka.

Gekko chikí tin kolónan masha kla kasi por mira dor di nan. Esnan mas grandi ta mas shinishi ku plèkinan skur. Meskos ku tur reptil e gekkonan ta pone webu den hòlnan den santu/tera. Nan mes no ta inkubá nan webunan i tampoko ta kuida di e yunan ora esakinan nase.

Gekko no ta peligroso. Nan no ta solamente bestianan masha prèt pa mira pero nan ta útil tambe. Si bo tin un gekko den bisindario ta manera un flit natural kontra tur muskita i sangura.

Pregunta 2; un kolebra di mespel ta un kolebra òf un lagadishi (Hagedis)?

E nòmber kisas ta duna un impreshon robes. E kolebra di mespel no ta un kolebra ètòl pero ta un tipo di lagadishi/’hagedis’. Por lo demas e parse un kolebra pasobra e tin pianan ku bo no ta ripará i strepinan blanku riba su lomba, pero e ta un lagadishi (hagedis).

E kolega di mespel ta biba den serkania kaminda ta haña hopi blachi seru pasobra e ta biba di insektonan chikí. I p’esei su nòmber ta bin di esei. Pasobra bou di un palu di mespel hopi bia tin mespelnan kaminda ta haña insekto tambe. I p’esei e yama un kolebra di mespel.

Bo a yega di mira un kolebra di mespel? Esei no sa sosodé mashá pasobra nan ta skonde pa e lagadishinan grandi i pa paranan ku ta kue nan. Den kaso di urgensia meskos ku otro lagadishi, e ta kibra su rabu komo maniobra di desviashon pa asina e por hui bai mas lihé. E bestia ku ke kome e kolebra di mespel ta bai e ora ei riba e rabu ku ta keda move pa asina e kolebra mes por hui bai. Despues di tempu e rabu ta krese bèk.

Pregunta 3; un Blòblò ta blou semper?

E blòblò ta un lagadishi ku ta bin hopi na Kòrsou. E ta realmente un ‘omnivor’ esta e ta kome tur kos, e ta kome fruta, insekto i webu for di nèshinan. E hòmbernan adulto tin un teritorio ku nan ta protehá kontra di e otro hòmbernan. Den kurá hopi bia por mira nan ta kore tras di otro.

E bestianan yòn i e muhénan ta koló maron i e hòmbernan tin koló blou riba nan kabes i nan pianan ta un koló blou bèrdè. Hopi hende ta kere ku e lagadishinan ta yen koló pero nan ta blou blou. Komo ku e muhé i e hòmber ta diferente di otro ta yama e hòmbernan blòblò i e muhénan lagadishi.

Pregunta 4; kiko un Anolis/Totèki i ta kome

Un Anolis òf Totèki ta un ‘hagedis’ ku por keda rekonosé na e saku hel ku e ta saka bou di su kachete. Ora e hòmbernan ke protehá nan teritorio nan ta saka e saku aki. Tambe e ta hasié ora e ke atraé un di e muhénan.

Kada isla den Karibe tin diferente sorto di Totèki. Ta animalnan delegá, koló maron ku strepi pretu kantu di nan kurpa. Un koló perfekto pa skonde i ku e tin mester pasobra e bestianan grandi manera paranan yagdó ta yag riba nan. Meskos ku e Blòblò i e kolebra di Kòrsou ke kome e totèki aki sigur. E totèki mes ta kome insektonan chikí.

Gosa di nos naturalesa

Si bo topa un bestia den naturalesa i bo tin pregunta manda esaki na info@carmabi.org òf tambe por wak e páginanan di informashon riba bestianan di Kòrsou riba www.carmabi.org/educatie.

Si bo wak bon, nos naturalesa ta mas bunita ku bo ta pensa!