WILLEMSTAD.- ‘Komo gerensia nos ta para pa un sero toleransia pa lokual ta trata ladronisia. Nos no tin diferensia di opinion ku sindikato CBV pa lokual ta e normanan. Pero si tokante e medida ku nos a tuma na momentu ku nos a konstatá un akto di ladronisia na CMC.’ Asina direktor di Curaçao Medical Center (CMC) Gilbert Martina a bisa ayera. Gerensia di CMC durante un konferensia di prensa ayera a duna nan punto di bista tokante wèlga ku a tuma lugá djárason 12 di ougùstùs na CMC. Sindikato CBV a yama su miembronan na CMC pa un akshon, debí na retiro di un trahadó. Martina a splika ayera ku ta toka un kaso individual. ‘Nos no por duna tur detaye. Pero sindikato a trese un veredikto dilanti na unda korte ta bisa ku e persona tin ku reanudá trabou. Pero tin un otro veredikto kaminda korte ta bisa ku ta disolvé relashon di trabou ku e persona tin ku CMC.’ Segun Martina tin dos veredikto. Ku segun Martina ta nifiká ku CMC no niun momento dado no a falta ku niun lei. ‘Nos tei pa kumpli ku tur lei. Tur konseho hurídiko ku nos a haña ta indiká ku ta dos veredikto tin. I e veredikto ku ta disolvé relashon di trabou ta esun ku nos ta sigui.’
Martina a splika ayera ku gerensia ta sinta ku sindikato dos bia pa luna for di momentu ku hospital a habri. ‘Nos ta sinta di 3 or te 5 or di atardi, tin ora ta 6 or di atardi. Nos ta informá sindikato tokante tur paso. Pero den e kaso spesífiko di e trahadó ku a wòrdu retirá pa motibu di ladronisia nan no ta di akuerdo ku desishon ku gerensia a tuma. Nan ta haña ku e miembro tin ku reanudá e trabou bèk. Anto nos a bisa e sindikatonan ku esei no ta posibel. Pasobra na final gerensia ta responsabel. No solamente pa trahadó pero tambe pa pashènt ku nos ta duna kuido den CMC. Nos tin informashon ku tin akto di ladronisia. Sindikato ta bisa ku no ta asina. Sindikato a bisa ku ta toka di un persona ku a tuma kuminda bieu for di tempu di Sehos bai kas kuné. Pero no ta restu di kuminda so. Tin mas kos ku e persona a bai kuné. Ku pa nos ta un akto di ladronisia.’