Kelly de Vries di Fundashon Peter R. de Vries

WILLEMSTAD.- Manera tabata anunsiá kaba Fundashon Peter R. de Vries na Hulanda e siman aki a kuminsá pidi atenshon na Kòrsou pa asesinato di yu’i Kòrsou Rosleny Magdalena. E asesinato a tuma lugá seis aña pasa. Kelly de Vries, ku ta yu di defuntu periodista Peter R. De Vries i direktor di Fundashon Peter R. De Vries, awe a papia ku diferente media na Kòrsou i tambe Sürnam. Tambe a presentá informashon di e asesinato na Papiamentu den un ‘stripboek’.

Manera ta konosí den aña 2016 deskonosí(nan) a asesiná yu’i Kòrsou Rosleny Magdalena na Amsterdam Zuidoost. Dia 17 di novèmber 2022, presis 6 aña despues di e asesinato, e Fundashon a duna di konosé ku tin 100.000 euro pa e tep di oro.  Tambe e fundashon ke sa mas tokante un persona riba un baiskel ku riba imágen di e vidio tabata hopi serka di  Rosleny na momentu di asesinato. Si hende sa mas di e persona fundashon ta ofresé 25.000 euro pa e tep di oro.

Segun Kelly de Vries famia di Rosleny te ainda tin hopi pregunta. E fundashon ta traha duru pa haña informashon pa nan.

Den e último lunanan e fundashon a haña basta tep for di Hulanda, pero te ainda e kaso no ta resolbé. “Nos no ta sigur pero por ta ku lo tin hende na Kòrsou i Sürnam ku sa mas di e kaso. Rosleny a biba den Amsterdam Zuid-Oost, kaminda hopi Antiano i Surinameño ta biba. Ta posibel ku hende a move for Amsterdam i awor ke duna informashon tokante e kaso. Por ta pa motibu pa e tep di oro di 100.000 euro òf pasobra nan ke yuda duna e famia di Rosleny pas i trankilidat mental. Mi ta spera ku hende awor lo duna nos informashon.’

Pa duna tep i tambe pa haña informashon por bishita wèpsait peterrdevries.nl Riba e wèpsait tambe tin mas informashon tokante e asesinato.

PORTRET

...Parti di e ‘stripboek’ na Papiamentu tokante asesinato di Rosleny Magdalena...