WILLEMSTAD.-  Awe nos ta selebrá Dia Internashonal di Hende Grandi i e di sinku aniversario di Nostalgia. Nostalgia ta e proyekto ku ta hiba músika ‘live’ na hendenan den kasnan di kuido pa alegrá nan dia.

Ya pa 5 aña, Frensley (Pempy) Lucas ta bishitá kasnan di kuido tur dia den siman i ta kanta kantikanan konosí pa tur e residentenan. Via di e músika ‘live’ e sa entretené hende grandinan di diferente institushon i ta sòru pa nan pasa un ratu agradabel ku e kantikanan di ántes. Den e último 5 aña, Pempy a logra deleitá un promedio di 25 institushon pa luna ku su músika. E último 6 lunanan ku a pasa, Pempy no por a hasi nada i ta hañ’é un gran lástima. “Mi ta felis ku mi por a trese e proyekto na e kasnan di kuido den sirkunstansianan normal. Awor mi ta sinti falta di e residentenan, pero mi ta spera ku pronto lo mi por bolbe entretené nan ku mi músika”, sigun Pempy Lucas.

Na aprel 2015 a inisiá Nostalgia ku apoyo di El Tributo. Curaçao Cares, un organisashon lokal ku ta trata di inspirá i enkurashá siudadania aktivo i koheshon sosial, a ser kontaktá pa establesé i kordiná e proyekto. Nostalgia ta traha huntu ku e diferente kasnan di kuido pa logra ku e residentenan por disfrutá di un mainta òf atardi ku e aktividat di músika agradabel.

Den e último 6 lunanan, Pempy Lucas, ku ta boluntario, no por a kumpli ku su pashon debí na e Coronavirùs. Pa e rason aki, e hende grandinan por kai mas tantu den isolashon sosial. Músika ta aktivá, ta hasi bo felis, ta toka bo emoshon i ta duna konfiansa propio. Pempy ta spera di por bolbe entretené su kerido hende grandinan pronto. E organisashon ta en buska di alternativa para por reanudá e proyekto pronto.