WILLEMSTAD.- “E proseso ku nos a kana yega te ku ayera no tabata fásil. Al kontrario. Sinembargo el a demostrá ku ora nos tur ta pone nos nanishinan den mesun direkshon i pone Kòrsou komo nos meta huntu, nos ta logra.” Asina minister di Desaroyo Ekonómiko Eugene Rhuggenaath a splika ayera anochi durante e ‘start event’. Rhuggenaath:   “Sakrifisio, Kreatividat i Determinashon ta karakterisá tur kos ku ta nesesario pa nos selebrá huntu e logro ku Damen.”

Rhuggenaath: “Pa mi esaki ta un bon ehèmpel ku nos tin e kapasidat pa traha huntu i logra kosnan grandi. Mi ta konvensí ku si nos kombiná e mesun ingredientenan aki den otro proyektonan na bienestar di nos pueblo, nos lo sigui logra kosnan grandi huntu.” Ku e traspaso di operashon di Dòk den man di Damen atenshon mester bai mas den direkshon di trenmentu di mas industria kreativo, segun Rhuggenaath. “Relatá ku nos hafnan i Dòk, pa  asina krea mas desaroyo ekonómiko pa nos Isla i krea mas trabou pa nos yunan di tera.” Den su spich Rhuggenaath a gradisí tur otro minister i tur mandatario tambe ku tabata enbolbí den e proyekto ei. “Pero tambe tur hende enbolbí  gubernamental i semi-gubernamental ku a duna un man pa solushoná opstákulonan na un manera diligente.” Segun Rhuggenaath te ayera mainta trahadó di minister a bin pa yuda pa yega na e akuerdo ku Damen.

Rhuggenaath a yama danki profundamente na Clift Christiaan pa su yudansa den e proyekto.