WILLEMSTAD.- Minister-presidente Eugene Rhuggenaath a bisa djaluna último durante konferensia di prensa di gobièrnu di Kòrsou ku e ta deseá su kombibensia i kondolensia na famia Godett. Rhuggenaath tabatin kontakto ku famia djadumingu último relashoná ku e asesinato di Almier Godett. Rhuggenaath: ‘Almier a bai laga nos. Un yònkuman ku mi a sera konosí ora nos tabata huntu den direktiva di FKP. I ku semper mi a karga hopi apresio pe. I sigur pa su mama Jacqueline ku a traha ku nos na Konseho Insular di Kòrsou.’
Segun Rhuggenaath e asesinato ku a tuma lugá djadumingu mainta a shòk tur hende. Rhuggenaath a bisa ku henter pueblo di Kòrsou ta karga ku famia Godett i e miembronan di partido ku Almier a forma parti di dje.

Mas aleu Rhuggenaath a bisa ku e ta spera ku e asesinato di Godett por tin komo konsekuensia ku komo komunidat nos ta stòp ku violensia den nos komunidat. Segun Rhuggenaath nos tin ku siña nos yunan ku violensia nunka mester ta un opshon. Na su opinion komo komunidat nos mester duna mas atenshon pa konsientisá nos yunan tokante esaki. ‘Si esaki lo tuma lugá, nos por sòru ku e asesinato horibel tòg por tin un konsekuensianan positivo.
Manera ta konosí Almier Godett a keda asesiná djadumingu mainta na momentu ku el a purba di intermediá entre un bringamentu entre miembronan di famia. Esaki a tuma lugá den bario di Juan Domingo. Asesinato di Almier Godett (38), yu di Jacqueline Godett - ku ta ruman muhé di polítiko Anthony i eks minister-presidente Mirna Godett - ta e promé asesinato di e aña aki.