WILLEMSTAD – Dia 31 di yüli un kantidat di aproksimadamente 204 studiante lo
sali pa Hulanda pa sigui ku nan studio ku un beka di SSC. Nan lo biaha den dos
grupo ku e buelo nan di KLM, respektivamente KL 736 ku lo sali 4:35 PM i KL
789 ku lo sali 7.30 PM.
Mirando ku djárason ta un di e dianan di operashon mas drùk na nos
aeropuerto, Curaçao Airport Partners (CAP) tin algun adaptashon di
prekaushon pa laga tur operashon na aeropuerto riba e dia aki kana mas
efisiente posibel.
Tur studiante ta wòrdu permití pa drenta sala di “ check in” ku dos adulto. E
studiantenan mester ta na ora pa “check in” i subi bai ‘departures’ mesora
komo ku djárason ta un dia ku ta bira drùk i lo por tin kongestion na e punto
nan di kontrol.
Pa loke ta trata e promé buelo KL736, e studiantenan mester "check in" 12:00
PM. Pa 2:00 PM tur studiante mester ta paden.
Studiantenan ku ta bai ku e di dos buelo KL789, mester "check in" 4:00 PM i
mester ta paden 5:30 PM.
Pa loke ta trata parkermentu; ta importante pa tene na kuenta ku ta prohibí pa
parker den área nan ku no ta ofisial pa parker, manera Rooseveltweg, lugánan di
parker pa personanan desabilitá i tambe na e ‘drop-off zone’. Vehíkulonan ku
wòrdu di parker den áreanan prohibí , lo wòrdu di tou sin eksepshon.
Gastu di tou ta ANG 180,- pa e shofùr di e vehíkulo ku wòrdu di tou.
Por stashoná vehíkulo solamente na lugánan ofisial pa parker, esta den
parkerplaats.
Pa pasaheronan ku mester biaha riba e fecha aki, ta rekomendabel pa ta
presente mínimo 3 ora promé ku nan buelo na aeropuerto.
Si mester trese pasaheronan aeropuerto, por fabor usa e ‘drop-off zone’. Nos ta
sugirí pa hasi esaki mas rápido ku ta posibel i asina evitá kongestion den e
fluho di tráfiko.
Curacao Airport Partners ta deseá nos studiantenan tur klase di éksito den e
etapa nobo aki di nan bida.