WILLEMSTAD.- Relashoná ku e situashon na Aqualectra kaminda den un siman Kòrsou a konosé 3 blackout, eks atministrador di e tempu ei OGEM BV i alabes eks direktor finansiero di Aqualectra Distribution Ronald Ortela ta duna Aqualectra algun konseho i un di nan ta pa drei bek e desishon ku a integrá Aqualectra i CRU den otro.

Sr Ortela ta splika ku despues di desishonnan robes polítikamente tuma den añanan 2005 pa 2012 di diputadonan Nelson Pierre i Humphrey Davelaar i tambe promé minister Gerrit Schote, a enkargá Darick Jonis 1 di aprel 2012 ku maneho di e empresa di Integrated Utility Holding (Aqualectra), un empresa ku e tempu ei tabata praktikamente fayit. Jonis durante di añanan ku a sigui, sin tabata dispone di un bon plan di mas aña, a hasi milager pa e empresa por tabata unu sano finansieramente i téknikamente.

Ortela ta bisa ku e úniko desishon robes ku e por laga kai riba Jonis ta integrashon di e netwerknan di Aqualectra i CRU usando e enlase eksistente entre Cru i e supstashon Nijlweg. E integrashon a tuma lugá durante òf despues di nombramentu di Ir Irving Hanst esaki riba petishon di minister di finansa Jose Jardim ku tabata enkargá ku Aqualectra, komo direktor interim di CRU.

Sr Jonis ta bisa den prensa lokal ku Aqualectra  Crus mester di otro i esaki por ta bèrdat den aña 2020 pero nunka esaki tabata e intenshon. CRU Mester ta outosufisiente. E koriente di mas ku CRU ta entrega na Aqualectra no mag di bira un obligashon di parti di CRU. E mester ta mas bien algu inesperá. Sr Ortela ta bisa ku Kòrsou ta e úniko pais den mundu kaminda un integrashon di netwerk di energia públiko ta tuma lugá ku un refineria lokal. Esaki nunka mester a sosodé.

Ronald Ortela ta duna Aqualectra dos konseho;

Na promé lugá drei bek e integrashon. E solushon te ainda ta e plan original di su hefe ir Mario Evertsz den e preparashonnan i negosiashonnan pa lantamentu di BOO (CRU).

Ku e planta di disel di e fabrikante MAN ku refineria Isla a traha riba e palabrashon an e momentu ei ku BOO lo tuma den maneho, Aqualectra na su turno lo tuma e planta di disel over pa amplia esaki den un planta di disel pa futuro komo Back up. E planta aki originalmente tin un kapasidat di 38 MegaWatt i na su ampliashon ku 38 MegaWatt e lo a yega e reserva total di ed kapasidat di reserva ku ta 76 MegaWatt.

Esaki ta mas òf ménos mitar di e kapasidat pik di Aqualectra di 13 MegaWatt, tambe sufisiente pa duna CRU 63 MegaWatt.Boo mes tin mester di 15 MegaWatt miéntras ku refineria propiedat di RdK den su kapasidat máksimo di operashon ku 220 mil bari mester di 48MegaWatt. E planta di BOO na kuminsamentu di 2003 tabatin un kapasidat di 165 MegaWatt.

E idea di ir Mario Evertsz tabata pa mantené e operashon di e planta disel despues di un ekspanshon di 38 Megawatt di akuerdo ku e strategia di OGEM ku reserva rotatorio.

Ora KAE a keda enkargá ku e produkshon di energia na 1978, e strategia di distribushon di OGEM a keda bandoná i remplasá pa e strategia di produkshon ku potensia di reserva stándar kaminda si un unidat di produkshon faya inesperadamente, semper tin un interupshon di koriente a korto òf largo plaso, dependiendo di e kapasidat di e unidat di produkshon.

E di dos konseho di Ronald Ortela ta; e parkenan di molina di bientu di Playa Canoa i Tera Kora mester tin instalashonnan di bankinan di bateria den e supstashonnan Brievengat i tera Kora. E suministro di bientu den último dianan no tabata masha den último dianan. Ortela ta sospecha ku esei por  a kousa e black outonan. E turbinanan aktual di Vestas ta funshoná ku kahanan di kambio. E turbinanan ta masha sensibel den suministro di bientu loke ta nifiká ku e turbinanan di bientu ta funshoná regularmente den un “safe mode” Esaki ta provoká instabilidat den e ret, E kompra di bateria ta karu i ta hasi e koriente di bientu no rendabel. Den e  kaso aki Boneiru ku EcoPower ta un ehèmpel. E tarifanan di koriente na Boneiru no a baha pero kontrali nan mester a subi.

Ortela ta bisa finalmente ku e lo bin bek ku su historia riba e desishonnan robes tuna pa personanan responsabel den periodo di 1 di mart 2003 ta ku 1 di aprel 2012 ora Darick Jonis a bira direktor apuntá.