WILLEMSTAD.- Den su karera di 34 aña komo bankero, Chicú Capriles a eksperensiá ku durante hopi di e añanan akí Kòrsou a pasa den situashonnan ekonómiko difísil. Na banko tabata papia tambe riba kon kasi tur aña ekonomia ta kontraé. Último añanan esaki a kambia. Por tende esaki tambe den komentarionan.

Aunke ku den su karera bankario tabatin momentonan di kresementu ekonómiko, e kresementu ku ta pasando aden aworakí segun Capriles ta esun di mas signifikativo ku el a yega di eksperensiá. Asina el a trese dilanti den e podcast ‘3’or ku Gino’ riba plataforma digital di EXTRA.

Na banko ta mira ku aktualmente tin hopi demanda pa fiansa. Fiansa pa traha kas òf kumpra kas. Tambe tin proyektonan grandi na entre otro Sta. Martha i den Pietermaai ku mester di finansiamentu. Alabes mester di sufisiente personal pa yena tur e vakaturanan.

Esaki ta mustra riba e retonan ku pais ta konfrontá ainda apesar di e kresementu akí. Unu ta ku e kresementu akí mester resultá alabes den un adelanto den situashon di kada siudadano, pero tambe ku mester tin e kapital humano rekerí. Di un banda tin desempleo ainda na Kòrsou, pero ora papia ku esnan ku ta traha den e sektor turístiko por tende kon difísil e ta pa haña trahadó, Capriles ta indiká.

For di e sektor di hospitalidat manera hotèlnan, restorantnan i barnan por tende ku esun ta kita trahadó for di otro. “Den pasado ora a pasa den tempunan mas difísil hopi hende tabata piki nan bulchi bai Hulanda, pero tambe tin ku a bai St. Maarten i mas resien Boneiru.” Esaki segun Capriles tambe a afektá e kapital humano di Kòrsou.

Na su opinion sinembargo na e momentonan akí tur hende ku ke traha, mester por haña un trabou. “Awor asta ta bai suavisá e moratorio pa asina trese trahadó for di eksterior, loke ku na promé instante no ta zona lógiko si bo tin desempleo ainda.” Apesar di e situashon akí Capriles ta sinti ku tiki tiki ta bini un kambio den e disponibilidat pa yunan di tera traha den e sektor.

“Mi ta tende di amigunan estranhero ku ta bishitá Kòrsou ku regularidat, ku e servisio i trato ta mas mihó. Banda di e destinashon Kòrsou mes ku ta atraktivo, e servisio ku ta duna tambe ta kontribuí na kresementu di e sektor turístiko.” Pa bini bèk riba e pregunta si repartishon di e bonansa ku Kòrsou ta pasando aden na e momentonan akí ta bon dividí, Capriles ta bisa ku esaki por ta mihó pasobra na su opinion no tin niun rason pa tur trahadó na Kòrsou tin mas forsa di kompra.

Capriles resientemente a pone un punto tras di su karera komo ehekutivo di Maduro & Curiel’s Bank. E ta keda envolví ku e banko komo miembro di e hunta di komisario.

Foto:

Chicú Capriles