Howard Hinds tambe ta bin di un famia deportista. Tata den baseball pero e yunan a bai den landamentu. Howard a kompetí na dos okashon den olimpiada, na 1996 i 2000. El a forma parti di tim di landamentu na Fort Lauderdale. Aktualmente e tin 19 aña bibando na New York ku su famia ku ta konsistí entre otro di dos yu muhé. E tin 8 aña kasá. Howard tin su mes negoshi di personal training 10 aña kaba trahando den New York City. I e aña el a kuminsá un programa di natashon na Long Island (NY) tambe. I pa koroná su trabounan Howard tambe a drenta Hall òf Fame.

Siman pasá nos a papia ku Harvey Hinds un di e rumannan Hinds. E siman aki nos tin Howard ku manera nos a bisa, ta biba na Merka. Tur e kuater rumannan tabata landa ounke nan ta bin di un kas ku e tata ta mas den baseball. “Ami semper kier a hunga baseball”, Howard a bisa ku un sonrisa, pero tòg el a bai mas profeshonal den landamentu. Howard a splika ku na mei e aña aki el a kuminsá ku un programa di natashon na Long Island i awor aki nan tin 3 seshon kaba i ta kuminsando ku lès pa adulto tambe. Howard ta kresiendo poko poko i hasiendo e programa poko mas grandi.

Mi tabata gusta baseball i basketbòl mas

Kontando su eksperensia di natashon kaminda asta el a partisipá na weganan olímpiko, Howard a splika ku for di 4 pa 5 aña ya e tabata landa. E tabata landa masha bon i tabata kibra basta rèkert na momentu ku e tabatin su 8 aña. Despues Howard no tabata interesá den landamentu mas manera su dos rumannan grandi si. E dos rumannan aki tabata landa bon den ekipo nashonal. Howard no kier a landa mas pero e kier a hunga baseball, e kier a hunga basketbòl i hasi tur kos pero natashon no mas. Dado momentu Howard kier a haña e oportunidat pa tambe ta den e tim nashonal, ora e tabatin 13 aña. Pero e coach a bis’é ku manera e tabata trein e no por logra. Howard a bisa ku esei a sende un kandela bou di dje i mesora el a kuminsá trein i a hal e tempu pa asina e por a drenta ekipo nashonal pa bai eksterior.

E trayektorio den  landamentu einan a bira un poko mas serio pero ketu bai e kier a hunga baseball i basketbòl. Baseball tabata poko difísil pa hasi i asina Howard a kuminsá ku basketbòl huntu ku su ruman Harvey, “Mi ta kòrda mi tata a bisa mi si mi ke hunga basketbòl, bo tin di landa i landa bon tambe. Mi a gusta basketbòl asina tantu ku mi a bisa ta oké mi ta kuminsá trein landa. Asina mi a kuminsá krese un poko tambe. Mi tabata flaku flaku i esei tabata un di e motibunan dikon e no tabata gusta landa. Ora mi ta den zuèmbruk ta wesu so bo ta wak. Mi a kuminsá krese un poko i bira mas grandi. Mi ta kòrda Harvey a logra un limit pa bai weganan panamerikano/sentro amerikano i Kòrsou no tabatin sèn pa manda e tim bai e kompetensia ei. Harvey a stòp di landa i a bai Hulanda pa sigui studia i ami a keda landa i mi tempu a kuminsá baha drástikamente”, Howard a bisa Djasabra. E ta kòrda kon el a kuminsá gana medayanan di oro, el a kuminsá biaha pa kompetensianan di landamentu. Mas resultado positivo e tabata haña mas  e kuminsá trein i mas motivá e tabata pa trein. I ku tur eseinan el a keda hunga basketbòl pero el a bira algu na banda i natashon tabata esun prinsipal.

2 wega olímpiko

E ta sigui konta ku dia el a bai weganan olímpiko na Atlanta (1996), el a bisa despues di esei e no ta landa mas. Pero e eksperensia ku el a pasa einan tabata asina bon ku el a disidí di bai 4 aña mas. El a bai Springfield i a bai landa. Su tempunan a keda bira mas mihó i asina el a logra bai weganan olímpiko 2000 na Sidney. “Te ainda, 21 aña despues ku mi a partisipá na weganan olímpiko, mi ta papia di dje i haña kippenvel”. Te ainda ora e wak weganan olímpiko e ta sinti e mesun emoshon ku el a sinti ora e tabata einan. Tabata un emoshon masha difísil pa deskribí. E ta kòrda en partikular na Atlanta ora el a subi startblok e tabatin hopi nèrvio. E tabata tembla. El a hasi un eror pero den awa i tur hende tabata bati man. “Ora mi a landa mes mi no ta kòrda mashá. Nèrvio a gewon dominá mi”, Howard a bisa ku e mesun sonrisa. Na Sidney e tabata mas prepará i tabatin mas eksperensia. El a bai weganan panamerikano tambe sentro amerikano i eseinan no ta olimpiada pero ta prepará bu bon si. E ta kòrda ku na Sidney a bai mihó i ku e no tabatin asina tantu nèrvio. Ta atletanan tòp den e deporte ta bai weganan olímpiko i ta masha difísil pa asta bo yega final. Howard ta kòrda ku den su kategoria ta mas di 100 hende ta landa i ta 16 so ta bai final. E ta kòrda e tabata e di 50 i 51 den e kantidat di 100 kompetidónan. Tabata un dushi eksperensia segun Howard. El a bisa di a siña kultura di e pais manera na Oustralia nan a bai bishitá diferente lugá, i esei ta algu ku el a disfrutá hopi di dje. Ta un eksperensia segun Howard ku e no ta lubidá.

Difísil pa a stòp

Kòrsou ta un isla chikitu, natashon internashonal na Kòrsou ta hopi difísil. “Asta si mi a trein akinan henter mi bida kisas lo mi no a landa pero hasi otro deporte. E nivel di coach, no ku mi ta bisa ku mi coach na Kòrsou no ta tòp, pero e invershon ku ta hasi na Kòrsou den deporte ta masha tiki. Mi ta kòrda tempu mi ta bai kompetensia, tin koleganan ta bira oranan leu i nan mayornan ta einan den tur kompetensia. Nan ta drenta outo òf subi avion i bai. E sosten ku bo ta haña di bo famia, i asta  e pais mes ta pone masha sèn mes den e atleta. Den eksterior natashon asta bo por konsiderá un entrada pa biba di dje. Despues di Sidney mi a haña scholarship via di International Olimpic Committe i nan tabata yuda mi basta pasobra ora mi a muda bai New York i kuminsá trein einan, hür di kas, kuminda ta basta sèn, e komité olímpiko internashonal a yuda mi ku esei. Nan tabata duna mi un suma pa luna pa asina mi por usa pa trein, kome i hür di kas. Mi tabatin mester di mas pasobra hür di kas ta karu i mi mester a buska otro trabou. Asina mi a haña trabou na zwembad. Mi ta lanta 5 or bai trein, despues bai gym, despues bai zwembad te atardi i despues 4 pa 7 mi ta trein atrobe i despues mi ta duna lès coach tambe”. Ku esaki Howard ta splika ku e ta yega su kas 10 or di anochi morto kansá. Tabata algu masha difísil. Mentalmente i físikamente e ta eksihí hopi. Esei Howard a hasi pa 4 aña.  Dado momentu nan a bai República Dominicana i el a hera di hal e limit pa bai olimpiada na Athena. El a faya nèt nèt. I esei tabata su despedida di landamentu. E tabata poko difísil segun Howard i el a keda un sentimentu masha laf mes pasobra tur kos a kaba asina. Nunka el a prepará pa bida despues di landamentu pasobra tur kos ku el a hasi ta landamentu.

Traha pa mi mes

Tabata difísil pa stòp i Howard no tabata sa kiko pa hasi. Pa ken e tabata mas difísil pa Howard òf pa su mayornan ku semper a push’é den e landamentu? Pa Howard el a siña hopi di landamentu; landamentu a hib’é yen kaminda ku nunka el a pensa di lo a bai. Pe e para ku landamentu tabata difísil pasobra tabata algu ku el a hasi mas di 20 aña largu. E no tabata sa kiko hasi sin dje. “Bo ta drenta den un mentalidat poko laf, no ku mi tabatin depreshon pero e tabata un temporada difísil, tabata un sentimentu ku e no tabata gusta. Mi a disidí di bai skol bèk i haña ku mester i kuminsá wak kiko mi por hasi despues di natashon. I ora mi a kaba mi a kuminsá duna lès na skol i esei tabata partaim. E tempu ei 2005-2006 tabata difísil pa haña trabou na Merka. Mi a disidí di kuminsá komo personal training. Mi a kuminsá traha na Manhattan downtown banda di e memorial 911 i einan mi a traha pa un gym pa 5 aña i despues mi a disidí ku mi ke traha pa mi mes.  Mi a kuminsá ku mi mes negoshi i awor aki mi tin 10 aña kuné. Esei a remplasá landamentu pa mi. Mi tabata lanta mesun kos, 5 or di mainta bai trein, i te anochi bai kas bèk”. Ami ku un amigu a haña un zwembad i a kuminsá ku un skol di duna lès di landamentu. Esaki ta loke Howard ta hasi mas ku e personal training awor.

Hall òf Fame

Howard a drenta Hall òf Fame. Debí na COVID e seremonia no por a tuma lugá te ku e wikènt aki. E ta kòrda ku aña pasá djis un siman promé ku tur kos a sera el a haña e-mail ku nan ta felisit’é. Despues tur kos a kuminsá sera i a keda skùif e seremonia te ku e siman aki. Ta un rekonosementu pa su karera ku el a pasa na Springfield komo atleta, studiante i komo representante di e skol i despues ku el a kaba skol. Tambe Howard tabata ‘all american’ den 3 evento na Springfield i te ainda e tin un rèkert ku un amigu di dje a empatá kuné.

Mi ke yuda Kòrsou

I pa loke ta baseball, Howard a bisa ku e mesun smile, ku tur anochi e ta wak baseball. E no ta mira su mes mas riba e tereno ei, ounke un temporada si el a mira su mes ta hunga baseball. Howard a bisa ku ainda e no a yega su tòp. Den e añanan ku el a duna lès privá, el a yuda bastante landadó ku a kualifiká pa kompetenshanan na Merka. “Mi metanan ku mi tin ku ora mi a kuminsá ku e zwemschool ta a yuda Kòrsou tambe.  E problema ta ku nos ta den temporada di COVID i mester wak presis kiko ta pasa na Merka.  Loke mi ke hasi ta kuminsá establesé e zwemschool na Merka promé i despues hasi algu asina na Kòrsou tambe òf yuda ku loke Kòrsou tin mester. Mi tabata papia ku Richard Leito ora mi tabata na Kòrsou aña pasá pa si tur kos bai bon mi ta kuminsá duna nan oloshi ku ta yuda den training etc., etc.. Mi ke hasi algu pa Kòrsou tambe pasobra kon ku bai bin ta yu di Kòrsou mi ta i Kòrsou a yuda mi yega kaminda mi ta i mi ke duna bèk”, Howard a enfatisá na Djasabra.

Awor mi ta hasi otro kos

E tempu ku landamentu a tuma for di mi, mi ta apresiá hopi pero mi ke hasi otro kos tambe. Eseinan mi ta hal eseinan ‘in’ awor aki, Howard a bisa indikando ku e no ta forsa su yunan pa bai kompetensia pero awor e ke pasa tempu ku su famia. Awor aki e ta bai sky i duik ku ta kosnan ku tempu e tabata landa e no por a hasi. Awor e ta probechá hasi loke e no a hasi den pasado, tempu e tabata trein.