WILLEMSTAD. - Ayera durante kaso Maximus profesor Stijn Franken na kabes di e tim di defensa di George Jamaloodin, a trese vários posibel senario di e asesinato di Wiels durante su nota di defensa. El a bisa ku na su pareser Ministerio Públiko no amplia nan investigashon riba esaki nan, pero a para ketu solamente na Jamaloodin.
Segun Franken, Wiels tabatin hopi enemigu pa su manera di trese kosnan dilanti di por ehèmpel instansianan, personanan òf echonan ku tabata tumando lugá den nos pais.
Franken a sigui bisa ku Elvis “Mònster” Kuwas i Raul “Bolle” Martinez no tabatin afinidat polítiko, pues klaramente nan a wòrdu buská pa kometé e asesinato. P’esei Ministerio Públiko ta konvensí ku tabatin kòmplòt grandi pa likidá Wiels. Franken a bisa mas aleu, nunka Kuwas a menshoná nòmber di Jamaloodin, pero a papia solamente di Nini.
Segun Franken hopi senario por a hunga un ròl, pero nunka Ministerio Públiko no a sigui amplia riba nan den un investigashon.
El a bisa Wiels no kier a traha ku MFK i tabatin problema personal entre nan dos.
Franken mas aleu a bisa ku un ratu promé ku Wiels a keda asesiná, el a haña un mensahe riba su telefòn ku a bis’é” Awor si ba nèk, Jardim ta daña tur kos pa bo, bo no ta bon”.
Segun Franken Ministerio Públiko no a hasi sufisiente investigashon riba e mensahe aki tampoko, pero ainda ta buskando e posibel intelektualnan ku lo a duna òrdu pa laga mata Wiels.
El a bisa tambe ku Wiels tabatin un kuenta na Miami ku despues di si morto a saka tur sèn fo’i dje, pero nunka OM a hasi investigashon pa sa ta ken.
Segun Stijn, ta posibel ku kos por a kaba serka Nini, paso a haña vários sms menasante di miembronan di NLS riba su telefòn kual nan a akus’é di a mata Wiels i daña nan nòmber mirando ku e ta bin di Koraal Specht.
Profesor Stijn a bisa ”Nos komo abogado no sa kiko ta konvens’é hues nan, pero si ta Jamaloodin su personalidat, nos sa ku e tin hopi muhé, e ta biba un bida di gasta hopi sèn el a malversá e 450 mil florin di gobièrnu, pero e pregunta no ta si e ta bon òf mal hende, pero e pregunta ta si konvinsentemente por akus’é di a kometé e akto aki, paso e konvikshon no tei”, e abogado ta añadí.