Djadumingu awor 11 di aprel 2021 pa 3’or di atardi

WILLEMSTAD.- Den bida tin un lucha entre realidat i bèrdat. Tin un realidat ku nos ta konfrontando, un pandemia pa motibu di COVID-19 pero tambe nos komo Iglesia sa ku tin un bèrdat, esta ku Dios su Miserikòrdia ta infinito i E ta nos solushon den e pandemia aki.

Obispo Luis Secco ta bisa ku p’esei nos ke sigui uni den orashon, gradisiendo Dios pa tur loke ku E ta hasi por medio di sientífikonan, dòkternan, enfermeronan, gobièrnunan di nos islanan i otro ekspertonan ku a uni pa huntu por hiba e lucha kontra di e pandemia.

Alabes nos ke pidi Hesus Miserikòrdioso pa e sigui tene miserikòrdia ku nos i sana nos islanan i tur pais di mundu i trese bèk pa nos e pas i trankilidat ku nos tin asina mester di dje.

Pa e motibu aki Obispado riba djadumingu di miserikòrdia, e di dos djadumingu di tempu di Pasku di resurekshon ta invitá tur kreyente pa huntu ban drenta den orashon nashonal pa pidi Dios su yudansa i protekshon.

Pa 3’or di atardi tur parokia lo bati klòknan di misa i nos tur ta resa e siguiente orashon òf un orashon ku ta sali for di profundidat di nos kurason.

“O Hesukristu, kara di miserikòrdia di Dios Tata, skucha orashon pa nos Diósesis di Willemstad: yuda tur ku ta traha den hospital, tur ku ta kontagiá ku e Coronavirus, tene miserikòrdia ku nos islanan. Yena nos kasnan di famia ku bo rayonan di speransa , di amor i sanashon pero tambe duna nos e grasia di kombershon.

Keda ku nos i sigui libra nos di e pandemia aki.

O Mama Maria, Inmakulada Konsepshon, Patrono di nos Diósesis, intersedé pa e enfermonan, pa esnan ku ta kuida nan i pa esnan ku a pèrdè nan bida ku nan biba pa semper ku Kristu Resusitá, bo Yu stimá, ku ta biba i reina den tur siglo di siglonan. Amèn.”