WILLEMSTAD.- Obispado di Willemstad, Mgr. Luis Secco a dekretá ku Tur selebrashon Litúrgiko i aktonan religioso públiko na Kòrsou i Bonaire a keda posponé te próksimo aviso.
Mgr. Secco ta indiká den su karta na saserdote, diakono, religioso i laikonan ku lamentablemente un biaha mas e situashon di e pandemia COVID-119 ku a drenta un estado mas kritiko, tin su impakto riba selebrashonnan litúrgiko. Despues di un evaluashon profundo ku e úniko meta pa sigurá ku ta tuma medidanan nesesario pa yuda frena e posibilidat di keda afektá ku COVID-19, e ta mira ku ta nesesario pa bini ku e dekreto aki ku ta drenta den efekto awe 24 di mart 2021.
E dekreto ta bisa ku dilanti di e gravedat di krísis ku e situashon aki ta trese kuné, pa e islanan di Diósesis; despues di a tuma medidanan di prekoushon ku e diferente dekretonan ku a emití; despues di a kontinuá ku diálogo ku gobièrnunan lokal di kada isla, i e medidanan nesesario ku a pone e islanan drenta den estado di “lockdown”; tumando na kuenta e importansia di selebrashonnan litúrgiko, ekspreshon di fe di Iglesia Katóliko Apostóliko Romano:
A base di esaki Mgr. Secco ta dekretá i ta tuma e desishon ku pa e islanan di Kòrsou i Boneiru, tur selebrashonnan Litúrgiko, pero tambe aktividatnan di karakter formativo, i katisashi, proseshonnan, fiestanan parokial i aktonan religioso públiko ta keda posponé te na un próksimo aviso. Mgr. A indiká di lo keda selebrá e sakramentu di enfermo i tambe e liturgia di entiero den misa, tumando na kuenta e medidanan di higiena ku tur hende tin di atené na dje.
Mas aleu Mgr. Secco ta bisa ku uso di medionan sosial manera radio, televishon òf facebook ta rekomendabel manera ya nan a yega di hasi den pasado.
Mgr. Secco ta indiká di ta bolbe sigurá ku e medidanan aki ta pa huntu yuda kontené mas ku ta posibel e vírus aki pa su impakto ta mínimo riba komunidat. “Boso salu ta di gran importansia no solamente pa e korona vírus, pero tambe en general. Boso por sigui konta ku mi orashon i ta urgi boso pa nos tur keda ku nos bista fiha riba Dios i keda den orashon”, te aki e karta di Mgr Secco.