WILLEMSTAD.-Hopi siudadano a keda bastante desapuntá pa e echo ku premier Rutte no a anunsiá ku lo bai suavisá medidanan relashoná ku Corona na Ulanda. Esaki a pone atenshon un bia mas na e nesesidat òf eksigensia pa PCR test pa e personanan ku mester bai Ulanda bek for di Kòrsou, Aruba i Boneiru. Kanalnan ofisial ta informa te ainda ku tur residente di Ulanda ku bishitá e tres islanan menshoná mester presentá un PCR test negativo banda di e echo ku mester keda 10 dia den karentena na kas.

Sinembargo e ministerio pa asuntunan interno i Relashonnan den Reino ta indiká ku ainda no tin obligashon na vigor, pues no por papia di un òrdu òf eksigensia ku hendenan ku Sali e tres islanan i bai Ulanda bèk, ku nan mester bai den karentena. Ta papia di un konseho urgente i serio ku ta hasi na biaheronan. Punto ta ku e proposishon di lei a bai pa e órgano di konseho di mas haltu reino ku ta Raad van State. Despues di kana e trayekto ei e proposishon lo pasa Tweede Kamer pa e konsehonan konserni.

Interesante ta ku e eksigensia ku na momentu di chek-in e biahero mester presentá un test negativo no ta regla pa lei. Meskos ta konta pa e konseho pa keda kas den karentena.