WILLEMSTAD.- CHATA a organisá su reunion di kuartal pa miembresia na Renaissance Curaçao Resort & Casino, ku e meta pa informá tur miembro riba e ultimo desaroyonan den sektor. E presentadó prinsipal tabata representante di Ulanda pa Kòrsou, Aruba i St. Maarten, Ministerio di Asuntunan Interino i Relashonnan den Reino, Sr. Erwin Arkenbout kende a djòin Kòrsou su Minister di Desaroyo Ekonomiko, Sr. Steven Martina i tambe Presidente i CEO di CHATA, Sr. Miles Mercera pa un presentashon i hiba un kombersashon tokante rekuperashon ekonomiko.

E mainta a kuminsá ku Sr. Mercera yamando un bon bini na tur e miembronan i anunsiando e importansia di rekupersahon ekonomiko, sigur durante e temporadanan difisil akí. Prome ku yama Minister Steven Martina riba esenario, Sr. Mercera a duna un presentashon breve, kua a inkluí un rekapitulashon di e desaroyonan den e ultimo lunanan, i tambe a duna un bista riba e okupashon di hotel ku CHATA ta monitoriá tur siman desde yüli 2020. CHATA a kalkulá ku e averahe di okupashon di hotel durante e luna di yüli tabata 18% – 22%. Durante di e presentashon, Sr. Mercera a referí bèk na un webinar ku Sr. Jim Hepple, kende ta Analítiko di Data Karibense i Turismo, a presentá durante di lockdown, pronostikando ku Kòrsou lo eksperensiá e senario probabel ora di rekuperashon turistiko. E senario probabel ta enserá ku Merka i Ulanda lo kontinuá ku medidanan di distansia sosial durante luna di mei i posiblemente jüni i lo mantené e restrikshonnan di entrada pa nan pais te ku mei-jüni. Hende lo bolbe nan trabou poko poko, sinembargo mayoria hende lo no kuminsá traha bèk te jüli/ougùstùs.

Area ‘advocacy’

Sr. Mercera a sigui informá miembronan di CHATA tokante e desaroyonan riba e area di Advocacy, manera e implementashon di CTA i Level Playing Field, enfokando e importansia di e proyektonan akí, kua lo kontribuí na rekuperashon di turismo. Tambe sr. Mercera a menshoná e kolaborashon entre CHATA, CTB, MEO i GMN pa yuda subi e kapasidat di bishitante pa luna di 10,000 pa 20,000.

Pa klòusurá su presentashon, sr. Mercera a pasa riba un influensia positivo riba e sektor. Apesar ku nos ta den un temporada difisil, sra. Shalisa Cordelia a mira un oportunidat den lamunchi i asina el a kuminsa su propio negoshi di aw’i lamunchi, ‘Lamunchi D’oro’ ku e intenshon pa inspirá mas hende pa hasi lokual ku nan stima.

Presentashon minister

E mainta a sigui ku un presentashon di Minister Steven Martina. Minister Martina a indiká ku prome ku COVID-19 a ser konosí ku 2020 lo tabata e aña di rekuperashon ekonomiko. Ta asina ku Kòrsou a manehá debe públiko i a stabilisá finansa. Tambe a obtené un statùs di compliance manehabel, i tambe tabatin desaroyo riba areanan fruktífero, manera area di Ref, sentro di siudat, Zakitó i Santa Martha.

Presentashon Arkenbout

Despues di e presentashon di Minister Martina a toka turno na sr. Erwin Arkenbout, representante di Ulanda na Kòrsou, Aruba i St. Maarten. Sr. Arkenbout a pasa riba e desafionan ku tin den Reino Hulandes. Spesifikamente entre Ulanda i e islanan òutonomo den reino. Sr. Arkenbout a splika ku Ulanda ta dispuesto pa yuda. Sinembargo, tur pais lo mester hasi algun tipo di sakrifisio. Sigun e representante di Ulanda, e tres islanan òutonomo den reino tin hopi potenshal i pa e motibu akí, Ulanda ta dispuesto pa yuda tene nan kabes riba awa. El a sigui e presentashon splikando ku un reforma ta nesesario pa loke ta trata ekonomia, hustisia, finansa, salubridat publiko i edukashon. “Un esfuerso konhunto mester tuma lugá pa asina por hasi e kambionan nesesario. Ora un kompromiso pa loke ta trata esaki tuma lugá, nos lo por traha huntu. E intenshon di e legislashon ku Ulanda a presentá ta para pa tur banda traha huntu i no pa tuma kòntròl riba e gobiernu”, sr. Arkenbout a splika.

Sr. Mercera a sera e Reunion di Membresía splikando ku ta ora pa sigui pa dilanti i traha huntu. CHATA lo sigui tene su miembronan na altura di e último desaroyonan i ta spera di traha huntu ku tur banda pa asina por yega na rekuperashon di nos turismo i nos ekonomia.