WILLEMSTAD.- Na luna di òktober okupashon na apartamentu i hotèlnan chikí tabata mas abou ku na luna di sèptèmber. Tabatin un bahada di 6% segun CASHA.

CASHA (Curacao Appartments Small Hotels Association) ta representá empresarionan operador profeshonal di akomodashon na eskala chikí, servisio, fasilidat I atrakshon den sektor di turismo na Korsou. CASHA ta desplegá su aserkamentu profeshonal i deliniá pa representá, guia I sosten na e sektor turístiko aki. Mensualmente CASHA ta informá tokante desaroyonan den e sektor.

Okupashon

CASHA ta informá tokante okupashon tuma entre 27 di su miembronan den luna di Òktober. Den komparashon ku e luna di Sèptèmber e sektor a registro un bahada ku 6% E okupashon pa Òktober tabata 19.3%.

Esaki a keda repartí ku un akomodashon ku a nota 50%, 4 akomodashon ku 40%. 8 akomodashon no tabatin okupashon. E resto di akomodashonnan a haña entre 3.9 - I 39.8% di okupashon.

Método apliká pa atrakshon

Oferta na públiko lokal di e konsepto Stay-Cation ku a yuda e okupashon pero na mes momento a ofresé ku preisnan redusí I konsekuentemente ménos entrada.

Tambe tabatin bishitantenan kustumbrá (repeaters) anual I famianan.

Pakete di fakansi na diferente wepsite di vakashon ku no a duna masha resultado. E último aki ta un método ku potensial ku lo bai wòrdu desaroyá mas profeshonal.

E total di reservashon nobo den òktober tabata 23 kua ta hopi mas abou kompará ku aña 2019.

Kanselashon

Den luna di Òktober tabatin 54 kanselashon di reservashon, kual ta un mehoransa ku 78 kanselashon den sèptèmber resien.

E motibunan pa kanselashon tabata: prohibishon pa biaha, obligashon enkuanto karentena na momento di regreso (Alemania, Canada i otro destinashon)

Tambe, biaheronan a preferá pa spera pa biaha mas lat, otronan no sinti ainda pa biaha I otronan a preokupá ku e posibilidat pa toke de keda, PCR tèst ku no a keda kla na tempu, tèst positivo, malesa, ansha, inseguridat I tambe Biaheronan a duna komo motibu e kantidat di notisia negativo den media.

Tendensia

Miembronan di CASHA ta menshoná un tendensia di biaheronan ku ta pidi te asta 50% di deskuento. Esaki ta tuma lugá regular via medio sosial, espesialmente Facebook.

Bon  i mal notisia tabata entre otro e “lus bèrdè” di gobiernu hulandes pa biaha pa Korsou den luna di desèmber. Na mes momento kompanianan di aviashon a kuminsá hisa preisnan bastante haltu pa e periodo aki.

Hopi empresario di akomodashon ta hiba e maneho pa aplasá fechá di vakashon pa mas lat den 2021 en bes di kanselashon. Esaki ta resultá den ménos entrada den 2021.

Pronóstiko pa Novèmber:

CASHA ta sigui bisa ku mirando e interes pa biahenan pa Korsou entre otro a konsekuensia di e anunsio di gobiernu hulandes pa biaha pa Korsou i tambe vuelonan reanudá pa Korsou for di Merka i Canada ta spera un oumento di reservashon nobo pa Korsou den luna di Novèmber.