WILLEMSTAD.- Kuerpo polisial ta informá ku djabièrnè último tabatin dos kaso ku nan mester a atendé kaminda hende muhé a bira malu i fayesé. Djabièrnè 21 di desèmber último pa mas o ménos 20:38 sentral di polis a dirigí un patruya na un establesimentu di horeca na De Ruyterkade. Aki un dama a bira malu, segun e informashonnan preliminar. Na yegada di e patruya a topa ku personal di ambulans tabata presente kaba te ku nan tabata reanimá e dama, pero sin resultado.

Un investigashon preliminar a mustra ku personal di e establesimentu di horeca a konta ku e dama a drenta baño di e establesimentu i no a Sali bek. Personal di seguridat a forsa e porta habri i a topa ku e dama for di su konosementu. Dòkter di polis ku a presentá na e sitio a konstatá morto di e dama A.V.K di 48 aña di edat. Riba òrdu di fiskal di ministerio públiko a konfiská e kurpa sin bida pa mas investigashon. E investigashon den e kaso aki ta kontinuá.

Den otro kaso polis ta informá ku den oranan mas tempran (15:03) riba e mesun djabièrnè sentral di polis a dirigí un patruya na Plasa Efraim Jonckheer kaminda un turista a bira malu. Na e sitio polis a topa ku personal di ambulans ku a trata na reanimá e víktima, pero esei no a duna resultado. Un investigashon realisá na e sitio e partner di e dama a deklará na polis ku e i su pareha tabata kanando i direpente e dama a sak den otro. Dòkter di polis ku a presentá na e sitio a konstatá morto di e dama (75) turista prosedente di Canada. Aki tambe fiskal a ordená pa konfiská e kurpa sin bida pa mas investigashon.