WILLEMSTAD.-Ministerio Publiko ta pone e suma di Fl 5000.- disponibel pa e persona òf personanan ku por duna informashon pa solushon di e kaso ku ta trata morto di Raiza Scoop. Na 2020 OM a habri e kaso di nobo di morto di Raiza Scoop.

E kaso en kuestion ta referí na e morto di un mucha muhé di 19 aña yamá Rayziënne (Raiza) Scoop. Den e mardugá di 31 di desèmber 2011 pa 1 di yanüari 2012, el a sali kas i tabata pèrdí pa un tempu largu. Riba 19 di mart 2012 a haña su kurpa sin bida den mondi di Playa Kanoa. E habri e kaso bèk mirando e gravedat di esaki, e edat hóben di e víktima i e presuntu forma kruel ku a asesiná e damita. Polis i Ministerio Públiko ta determiná pa trese klaridat den e kaso aki.

Na 2020 OM a ofresé Fl 20.000 pa e tep di oro i awe ta ofresé Fl 5000. OM ta bisa ku nan a hasi algun paso eksitoso den e investigashon. E rekompensa di 5.000,- florin ta pa esun ku riba un término kòrtiku mèldu na polis ku informashon krusial kual por sera e investigashon i solushoná e kaso definitivamente.

Por tuma kontakto mas pronto ku ta posibel ku polis riba e number di telefòn: 108. Lo trata tur tep risibí via di e number di telefòn aki di forma anónimo i konfidensial.