E banko mester paga 200 mil florin

WILLEMSTAD.-Ministerio Publiko (OM) a ofresé FirstCaribbean International Bank (Curaçao) N.V un areglo pa evitá un proseso penal. OM ta informa ku e fiskal ku ta traha den e Tim di Antikorupshon (TBO), a ofresé FirstCaribbean International Bank (Curaçao) N.V. un transakshon i FirstCaribbean Curaçao) a aseptá esaki.

Ta trata di e investigashon “Pyriet”. Na 2015, ku motibu di un solisitut di asistensia hurídiko mutuo, OM a pone beslag riba un kuenta bankario na FirstCaribbean Curaçao. E titular di e kuenta bankario bou di embargo ta suheto na un investigashon penal den eksterior, e saldo di e kuenta ku a pone beslag riba dje ta aproksimadamente Nafl. 1.000.000,-(un mion). Na 2020, un investigashon di OM a revelá ku FirstCaribbean Curaçao a paga e saldo na e titular di e kuenta sin ku OM a lanta e embargo for di esaki. Mirando ku retiro di aktivonan ku tin beslag ta un delito penal, OM a inisiá un investigashon penal kontra di FirstCaribbean Curaçao bou di e nòmber “Pyriet.”

Un investigashon a demostrá ku no a hasi notifikashon di transakshonnan inusual na FIU na tempu. E rigurosidat di e investigashon, su rapides i e medidanan interno tabata motibu pa OM ofresé un transakshon.

E akuerdo ku OM a yega na dje ku e instituto finansiero ta impliká ku FirstCaribbean Curaçao lo paga un but di NAF 200.000. Aparte di esei, e publikashon di e komunikado di prensa aki tambe ta forma parti di e transakshon. Un efekto sekundario di e transakshon aki ta ku e medidanan adoptá dor di FirstCaribbean Curaçao lo sòru ku den futuro lo komuniká ku FIU tokante di transakshonnan inusual (suphetivo) i ku FirstCaribbean Curaçao di e manera aki lo ta mas resistente pa práktikanan di labamentu di plaka. Mas detaye di e kaso den edishon di EXTRA.