WILLEMSTAD.- Relashoná ku e kaso ku a haña e nòmber Avior, Ministerio Públiko a sera un dil ku e sospechoso prinsipal W.S.C. E sospechoso mester paga un suma di Fl 250.000 i tambe renunsia vários propiedat e.o tereno i edifisio komersial, tambe fondonan riba kuentanan na banko i montantenan di sèn konfiská durante di e entrada hudisial.

Den e investigashon Avior a hasi investigashon riba labamentu di plaka i aktividatnan bankario klandestino ku W.S.C. i vários ko-outor tabata realisá. Den ougùstùs di 2017, bou di mando di wes komisario, a listra e kasnan di W.S.C i su ko-outornan, i tambe den algun negoshi vinkulá na e personanan aki.

E resultadonan di e investigashon penal ta konfirmá e sospecho ku den e periodo di 1 di ougùstùs 2011 te ku 15 di ougùstùs 2017, tabatin kuestion di labamentu di plaka intenshonal i ehersementu di e negoshi di institushon di krédito (internashonal) i di negoshi ku ta manda sèn i esaki sin pèrmit di Banko Sentral di Kòrsou i Sint Maarten. Konsekuentemente, Ministerio Públiko a ofresé W.S.C. un transakshon pa asina prevení mas persekushon penal.

Riba 9 di mart 2020, OM i W.S.C. a sera e akuerdo di transakshon. Den kuadro di e transakshon, W.S.C. lo paga un suma di NAF 250.000,- i ta renunsiá vários propiedat (inkluso diferente tereno i edifisio komersial), fondonan riba kuentanan bankario i montantenan di sèn konfiská (durante di e entrada hudisial).

Ministerio Públiko ta konsiderá e transakshon unu apropiá, teniendo kuenta tambe ku e fechanan ku a kometé e echo nan (2011-2017), e tempu ku a pasa despues di e konklushon di e investigashon penal (2016-2019) i e sirkunstanshanan personal di e sospechoso.

https://extra.cw/despues-di-2-ana-ainda-no-tin-fecha-ni-dagfar-pa-tratamentu-kaso-avior/