WILLEMSTAD.- Ministerio Públiko (OM) Kòrsou a anunsiá un ratu pasa ku nan a inisiá ku un investigashon penal (strafrechterlijk onderzoek), rondó di destrukshon ku a tuma lugá na porta di Baoase Resort den bario di Marie Pampoen djabièrnè último. OM ta informá ku un Fiskal di Ministerio Públiko ta enkargá  ku e investigashon aki ku ta na enkargo di kuerpo polisial di Kòrsou (KPC). OM ta bisa ku nan no por divulgá mas detaye na e momentu aki.

djabièrnè último alrededor di 150 hende a duna oido na e yamada di Julius Koko pa bai den e área di Marie Pampoen pa asina pueblo eksigí loke ta di pueblo bek. Koko a splika ku na su opinion e resort a kue tereno ilegal i tambe ta stroba pueblo di yega na playa. El a hasi yamada pa algun siman pa e manifestashon ku finalmente a kulminá djabièrnè atardi ku destrukshon di e propiedat na Baoase Resort.