WILLEMSTAD.- Ministerio Públiko (OM) i Kuerpo Polisial Kòrsou (KPC) ta atendé ku muchanan di skol ku bringa. Pero ta atendé ku nan pensando riba nan futuro pa no perhudiká nan.

Ayera un biaha mas tabatin bringamentu dilanti di porta di un skol, pero e biaha aki entre un alumno i wela di otro mucha di skol. Un situashon pafó di skol ku a eskalá i a bai terminá dilanti di skol.

EXTRA a papia ku bosero di Kuerpo Polisial sr. Imro Zwerwer kende a indiká ku na momentu ku denunsia ser hasí, Kuerpo Polisial ta aktua, pero tambe na momentu ku nan tuma nota di videonan ku ta bai rònt riba medionan sosial. Den tipo di kaso asina no ta warda denunsia, i komo Kuerpo Polisial ta aktua mesora spesialmente ora tin mucha envolví. Huntu ku OM ta atendé e kasonan di muchanan di skol.

Kasonan di bringamentu entre hende grandi, Kuerpo Polisial ta keda pendiente di denunsia pa atendé esaki.

Den kaso di muchanan di skol, sr. Zwerwer a bisa ta dependé gravedat di e kaso, ta atendé ku e hóben. Tin vários par di faktor ku ta hunga un ròl. Ora ta trata di mucha, dependé gravedat dje kaso, ta wak kon ta trat’é pasó e kaso por tin reperkushon pe mucha pa su futuro tambe.

EXTRA a papia ku fiskal di Ministerio Públiko sr. Guillano Schoop kende a splika ku pa bringamentu na skol no tin un indikashon di kastigu p’esaki. Lo atendé e kasonan di bringamentu na skol manera kaso di maltrato.

“Loke OM ta wak ta e gravedat dje echo, i wak edat i ki konsekuensia e tin pe hóben ora hustisia ta bai aktua. Si ta kaso hopi grandi ora tin arma ta muchu mas pisá ku un maltrato. OM ta evitá ku e hóben por haña problema ku hustisia, ta keda detené i no por sigui skol. Tin hopi aspekto adishonal pa tene kuenta kuné, kompará ku dos hende grandi ku bringa”, mr. Schoop a splika.

Kada kaso ta un. Hopi importante ta edat dje hóben si e mester kai será i pèrdè su skol. Ta purba di duna e mucha guia, ora ku OM atendé kuné. Ta wak te kon leu por intermediá, duna kurso “ART” ku ta para pa “Agresie Regulatie Training”, esta kon ta regulá bo emoshonnan pa ora algu pasa ku no ta bai reakshoná pa bai bringa. Huntu ku Jeugdreclassering ta ofresé hóbennan training.

Mas aleu sr. Schoop a bisa ku OM ta hopi dirigí pa evitá ku kos ta bolbe sosodé. Purba pa nan tin ménos molèster di echonan den futuro.

E grabamentu riba su mes no ta un echo kastigabel. E bringamentu ta sosodé riba karetera públiko, i ta meskos ku un hende ta graba un aksidente riba via públiko.

Mester tene kuenta esnan ku ta riba e video por bisa ku nan no ke pa sali ariba, e ora ei nan por bai kaso sivil den korte. Pero ta difísil pa kontrolá grabamentu, mr. Schoop a terminá bisando.