WILLEMSTAD.- Ayera Korte di promé instansia a posponé   kaso di ekspropiashon kontra di e hòmber N. Trinidat (39), eks propietario di “Hot Chicks Cafe” i “ Wings Cafe”, despues ku su abogado a distansiá su mes. Ministerio Públiko ke  ekspropiá e kantidat di ANG 778.790,60; for di e akusado. Trinidat a keda kondená pa trafikashon humano ku a haña e nòmber  “Tres Belle”.

Ministerio Públiko a akusá Trinidat i su ko akusadonan di tabata buska damanan for di Venezuela den e periodo di 15 mart 2017 te ku 8 di yüni 2019, pa via di Colombia nan bini Kòrsou ilegal, traha komo “ trago meisjes” i prostituí kontra nan boluntat.

Segun e akusashon, Trinidat lo a trese sigur 6 dama fo’i Venezuela dor di ofresé nan trabou den “Hot Chicks Cafe” sin kontrato. Na momento ku e damanan a yega Kòrsou, nan tabata keda obligá pa traha komo “ trago meisjes” i tene relashon seksual ku kliente paga nan debe.

Segun Ministerio Públiko e damanan tabata haña un kamber sushi pa keda aden i mester a paga 350 florin pa luna. Nan tabata kuminsá ku un debe di 2000 florin i mester  paga bèk segun nan ganashi. E debe mester a wòrdu pagá entre 4 pa 6  siman. Si un kliente kier a bai ku e damanan pa sex, e kliente mester a paga 120 pa 180  florin. Si nan mester yega lat òf no presentá,  nan mester a paga un but di 120 florin.

E damanan tabata wòrdu pagá 25 florin máksimo pa nan trabou den “Hot Chicks”, si ainda nan no a kaba di paga e debe di 2 mil florin. Mirando tur esakinan, Ministerio Públiko ta haña ku Trinidat tabata gosa di e ganashi di e tragonan karu ku e damanan tabata bende, bou di popularidat di e negoshi, mirando e kantidat di e klientenan ku tabata bishitá e lugá.

E tabata spar kostonan dor di no paga weter i no mester a paga impuesto òf pèrmit di trabou. Tampoko mester a sera un konvenio di trabou ku e trahadónan. E no mester a paga suèldu mínimo ni prima di malesa,  òf otro primanan sosial.

Pa Ministerio Públiko tur e echonan aki ta sufisiente motibu pa ekspropiá e kantidat supstansial di plaka ariba menshoná for di e akusado. Trinidat ta den libertat i a presentá ayera pa responsabilisá su mes.

Hues a bisa e akusado ku e mester trese e pruebanan di loke el a paga na impuesto, relato anual, registrashon di e kaha ku e tabatin den su negoshi i tambe dokumentonan di su atministrashon.

Trinidat a splika korte, ku nunka el a buska un hende pa hasi atministrashon pe.

E mes tabata hasié na su manera. El a bisa ku su tata a muri laga un tiki sèn pe i esei el a kue hinka den e negoshi kompletu.

E tabata frekuentá e famoso bar na “Cubaweg” i a mira kon bon e negoshi tabata drai i a disidí di lanta e mesun tipo di negoshi.

Segun e akusado mas aleu nunka e tabata sa ku tipo di negoshinan asina ta kontra lei. El a indiká ku niun di e dama nan por bisa ku el a trata nan malu.

Banda di esaki, e akusado a ninga e suma di plaka ku Ministerio Públiko ta akus’é di a ekspropiá.  Hues na final a pidi Trinidat pa e bai hasi e  “hùiswèrk” ku el a dun’é pa ora e kaso keda presentá atrobe hues por haña un bista.

E kaso a keda posponé pa  dia 10 sèptèmber binidero.