WILLEMSTAD.- Ministerio Públiko (OM) den un karta den kaso ku algun kompania “trust” a entamá kontra di un banko lokal i tambe Banko Sentral, a bisa ku nan no por hasi investigashon di orígen di plaka ku e “trust” tin riba nan kuenta na e banko lokal.
T’asina ku e shete “trust” nan ta eksigí nan plaka ku e banko lokal ta manehá. E disputa pasombra e banko ta deskonfiá orígen dje plaka. E banko ta para riba ku e plaka ta bini for di akto kriminal. Ya kaba e banko a hañ’e den problema ku hustisia pa labamentu di plaka di e kuentanan ku nan ta manehá i mester paga un but astronómiko. Despues di e kaso aki, e banko por paga e doño legítimo dje trust nan so. Pa hasi investigashon di orígen dje plaka, hues a pidi ministerio públiko nan opinion.
Den un sentensia intermediario ku tabatin anteriormente den e kaso aki, hues den e kaso sivil aki a pidi ministerio públiko pa duna kontesta riba algun pregunta. E pregunta ta relashoná ku orígen di e plaka di e “trust’ nan ku e banko lokal ta manehá pa nan.
Ministerio públiko no por a kontesta e pregunta.
Den su karta na korte di for di aña pasa, ministerio públiko ta bisa ku segun artíkulo 42 Rv enberdat OM tin e posibilidat pa duna konseho for di e bista di interes general den disputa entre dos partido. Pero esei no ta un obligashon. I artíkulo 42 no mester kibra e sistema kastigabel.
Ministerio públiko ta di opinion ku e disputa entre e trust nan, e banko lokal i Banko Sentral no tin motibu pa nan por hasi uso di nan outoridat, sea pidi of no, pa tuma un punto di bista pa duna un konseho.
Ademas pafó di e kuadro nan di investigashon penal, lo sali informashon sensitivo di e partidonan sivil.
P’esei korte ta konkluí ku e reakshon aki di ministerio públiko no a yuda e kousa i hues lo tin di husga e kaso aki riba loke ku partidonan a trese dilanti. Pues den esaki no ta tur ora ministerio públiko por bai hasi investigashon den e kaso aki. Manera ariba indiká ta trata di shete kompania trust ku a entamá kaso kontra di e banko lokal i tambe Banko Sentral relashoná ku plaka ku e banko lokal ta di manehá i kual tin duda di orígen dje plaka.